تہران (15 جولائی 2025): ایران کے صدر مسعود پزشکیان کا کہنا ہے کہ پاکستان نے اسرائیل کے خلاف جنگ میں جس طرح ہمارا ساتھ دیا وہ کبھی نہیں بھول سکتے۔
وفاقی وزیر داخلہ محسن نقوی نے ایرانی صدر مسعود پزشکیان سے تہران میں اہم ملاقات کی۔ اس دوران باہمی دلچسپی کے امور، پاک ایران تعلقات اور دوطرفہ تعاون پر تبادلہ خیال کیا گیا جبکہ محسن نقوی نے اسرائیل کے خلاف جنگ میں عظیم فتح پر صدر کو مبارکباد دی۔
محسن نقوی نے کہا کہ ایران کے سپریم لیڈر آیت اللہ خامنہ ای سمیت پوری قوم نے جارحیت کے خلاف ڈٹ کر مقابلہ کیا، سپریم لیڈر کی دانشمندانہ قیادت اور آپ کی بہترین حکمت عملی نے جنگ میں فیصلہ کن کردار ادا کیا۔
انہوں نے کہا کہ ایران کا جنگ میں فیصلہ کن کردار امت مسلمہ کیلیے باعثِ فخر ہے، پاکستان نے ایران پر حملے کی ہر فورم پر پُر زور مذمت کی، پاکستانی پارلیمنٹ نے ایران پر جنگ مسلط کرنے کے خلاف مذمتی قرارداد منظور کی، پاکستان نے ایران کے اپنے دفاع کے جائز حق کی حمایت کی۔
ملاقات کے دوران محسن نقوی نے وزیر اعظم شہباز شریف کی جانب سے ایرانی صدر کو نیک خواہشات اور احترام کا پیغام پہنچایا۔
مسعود پزشکیان نے کہا کہ پاکستان کے ساتھ اپنے تعلقات کو انتہائی اہمیت دیتے ہیں، اسلام آباد نے جنگ کے دوران جس طرح ساتھ دیا وہ کبھی نہیں بھول سکتے۔
انہوں نے کہا کہ صیہونی حکومت مسلم ممالک کے درمیان تقسیم اور کمزوری پیدا کرنے کی کوشش کر رہی ہے، اسلامی ممالک کے درمیان اتحاد اور ہم آہنگی ناگزیر ہے، مسلم حکومتیں اسلامی اتحاد کی اہمیت کو سمجھ جائیں تو وہ صیہونی حکومت کے خلاف متحد محاذ بنا سکتی ہیں۔
مسعود پزشکیان نے ایران اور پاکستان کے درمیان موجودہ دو طرفہ تعلقات پر اطمینان کا اظہار کیا اور جامع تعاون کو وسیع کرنے کیلیے سفارتی تبادلوں اور تعمیری مکالمے کی اہمیت پر زور دیا۔ انہوں نے اسرائیلی مسلط کردہ جنگ کے دوران پاکستان کی مخلصانہ حمایت پر شکریہ ادا کیا۔
ایرانی صدر کا کہنا تھا کہ دونوں ممالک کے پاس تعاون کو فروغ دینے کے بے پناہ مواقع ہیں۔
ملاقات میں ایرانی وزیر داخلہ سکندر مومنی، ایرانی صدر کے معاون خصوصی اور پاکستان میں ایران کے سفیر جبکہ ایران میں پاکستان کے سفیر موجود تھے۔