اسلام آباد (23 اگست 2025): نائب وزیر اعظم و وزیر خارجہ اسحاق ڈار بنگلہ دیش کے دو روزہ سرکاری دورے پر روانہ ہوگئے۔
نائب وزیر اعظم و وزیر خارجہ کا دورہ بنگلہ دیشی حکومت کی دعوت پر ہو رہا ہے۔ اسحاق ڈار کی ڈھاکا میں بنگلہ دیشی قیادت سے اہم ملاقاتیں ہوں گی۔
اسحاق ڈار کی چیف ایڈوائزر پروفیسر محمد یونس سے ملاقات ہوگی، وہ خارجہ امور کے ایڈوائزر محمد توحید حسین سے بھی ملیں گے۔
ملاقاتوں میں دو طرفہ تعلقات کے تمام پہلوؤں پر تبادلہ خیال کیا جائے گا۔
چند روز قبل اسحاق ڈار نے افغانستان کا دورہ کیا تھا جہاں انہوں نے قائمقام وزیر خارجہ سے ملاقات میں دو طرفہ تعلقات میں مثبت پیشرفت پر اطمینان کا اظہار کیا تھا۔
ترجمان دفتر خارجہ کے مطابق اسحاق ڈار کی مولوی امیر خان متقی سے ملاقات سہ ملکی اجلاس کے موقع پر ہوئی جس میں دو طرفہ تعلقات میں مثبت پیش رفت پر اطمینان کا اظہار کیا گیا۔
نائب وزیر اعظم نے پرتپاک میزبانی پر افغان حکام سے اظہار تشکر کیا تھا۔
ترجمان دفتر خارجہ کا کہنا تھا کہ پاکستان افغانستان نے قریبی تعاون جاری رکھنے اور انسداد دہشتگردی پر مشترکہ عزم کا اظہار کیا، وزرائے خارجہ نے خطے میں امن و استحکام کے فروغ پر بھی اتفاق کیا۔
اسحاق ڈار نے سیاسی اور تجارتی تعلقات میں حوصلہ افزا پیش رفت کو سراہتے ہوئے کہا کہ دہشت گردی کے خلاف تعاون میں نمایاں پیش رفت نہیں ہوسکی، افغان حکام کالعدم ٹی ٹی پی ، بی ایل اے مجید بریگیڈ کے خلاف ٹھوس اقدامات کریں۔
قائمقام افغان وزیر خارجہ امیر خان متقی نے کہا کہ کسی دہشت گرد گروہ کو افغان سرزمین کسی دوسرے ملک کے خلاف استعمال کی اجازت نہیں دی جائے گی۔