کسی جماعت سے وسیع تر انتخابی اتحاد نہیں کریں گے، اسحاق ڈار

اسلام آباد: مسلم لیگ (ن) الیکشن سیل کے سربراہ اسحاق ڈار کا کہنا ہے کہ ہم کسی جماعت سے وسیع تر انتخابی اتحاد نہیں کریں گے۔

پارلیمنٹ ہاؤس کے باہر میڈیا سے گفتگو کرتے ہوئے اسحاق ڈار نے کہا کہ سیٹ ایڈجسٹمنٹ محدود پیمانے پر کی جائے گی، مولانا فضل الرحمان سے اچھے تعلقات اور عزت و احترام کا رشتہ ہے لیکن احترام ایک طرف ہے اور انتخابات ایک طرف۔

اسحاق ڈار نے کہا کہ سیٹ ایڈ جسٹمنٹ کے اصولی فیصلے نواز شریف اور شہباز شریف کریں گے۔

انہوں نے کہا کہ ہماری پارٹی نے بھرپور طریقے سے ٹکٹوں کی تقسیم پر کام کیا ہے، 2200 سے زائد امیدواروں کے انٹرویو کیے ہیں تاہم ٹکٹوں کا حتمی فیصلہ اب اعلیٰ قیادت مشاورت سے کرے گی۔

ان کا کہنا تھا کہ ٹکٹیں 12 جنوری سے بہت پہلے فائنل کر دی جائیں گی، تمام امیدواروں سے کہا گیا کہ وہ کاغذات جمع کروا دیں، جن کو ٹکٹ دیے جائیں گے ان کے علاوہ باقی امیدوار کاغذات واپس لے لیں گے، ٹکٹوں کے حوالے سے پریشانی کی کوئی بات نہیں ابھی کافی دن ہیں۔

شاہ محمود قریشی سے پولیس سلوک پر اسحاق ڈار نے کہا تھا کہ قانون پر عمل ہونا چاہیے لیکن پی ٹی آئی کی تاریخ کوئی اتنی اچھی نہیں، شاہ محمود قریشی اور ہم نے اکٹھے سیاست کی ہے۔

سابق وزیر خزانہ نے کہا کہ سیاسی انتقام کی جو تاریخ پی ٹی آئی نے رقم کی اس کی مثال نہیں ملتی، اللہ کرے سب کو انصاف ملے۔