اسلام آباد: اسلام آباد ہائیکورٹ نے عسکری اداروں کے خلاف بیان پر تھانہ رمنا میں درج مقدمے میں چیئرمین پاکستان تحریک انصاف (پی ٹی آئی) عمران خان کو آج ہی عدالت میں پیش ہونے کی ہدایت کی ہے۔
اے آر وائی نیوز کے مطابق اسلام آباد ہائی کورٹ میں عسکری اداروں کے خلاف بیان پر عمران خان کی تھانہ رمنا میں درج مقدمے کی درخواست ضمانت پر سماعت ہوئی۔
اسلام آباد ہائی کورٹ کے چیف جسٹس عامرفاروق عمران خان کی عدم پیشی پر برہم ہوگئے اور سوال کیا کہ کہاں ہیں درخواست گزار؟
عمران خان کے وکیل نعیم حیدر پنجوتھا نے بتایا کہ وہ نہیں آئے، استثنیٰ کی درخواست دائر کی ہے۔
اسلام آباد ہائیکورٹ کے چیف جسٹس نے کہا کہ کہاں ہے استثنیٰ کی درخواست؟ جس پر وکیل عمران خان نے کہا کہ درخواست دائر ہو گئی ہے جس پر چیف جسٹس نے برہمی کا اظہار کرتے ہوئے کہا کہ یا ہم نیچے آگئے ہیں یا وہ اوپر آ گئے ہیں۔
چیف جسٹس عامر فاروق نے کہا کہ عدالتوں کو مزاق بنا کر رکھ دیا ہے، ہائیکورٹ کو سول کورٹ سمجھ رکھا ہےکیا۔
چیف جسٹس عامرفاروق کا کہنا تھا کہ عدالتی وقت ختم ہونے تک عمران خان پیش نہ ہوئے تو عبوری ضمانت خارج کردیں گے۔
اسلام آباد ہائی کورٹ نے عمران خان کی درخواست ضمانت کی سماعت میں وقفہ کر دیا۔