غزہ : حماس کے رہنما اسماعیل ہنیہ کے بیٹے اور بہو کا ویڈیو پیغام سامنے اگیا ، جس انھوں نے شہادت کو باعث فخر قرار دیا ہے۔
تفصیلات کے مطابق حماس کے سربراہ اسماعیل ہنیہ کے اہل خانہ نے ان کی شہادت کو باعث فخر قرار دے دیا۔
حماس رہنما کی بہو نے ویڈیو پیغام میں کہا آج میرے سسر شہدا میں شامل ہوگئے، غم بہت بڑا ہے، آنکھیں اشکبار ہیں، دل ان کی جدائی میں غمزدہ ہے۔
ان کا کہنا تھا کہ ہمیں امید ہے خدا ہماری قمست بدلے گا اور ہمیں بہتر حالات عطا کرے گا، قوم کے قائد کو الوداع کہتے ہیں۔
بیٹے عبدالسلام نے والد کی شہادت پر کہا میرے والد ہر روز شہادت محسوس کرتے تھے، ہمیں ان پر فخر ہے اور ہم اپنا سر اونچا رکھتے ہیں، میرے والد کا وہ خواب پورا ہوا جس کا انہوں نے خواب دیکھا تھا۔
یاد رہے حماس کے سربراہ کو ایران کے شہر تہران میں شہید کر دیا گیا، ایرانی ٹی وی کے مطابق ان کی رہائش گاہ کو علی الصبح نشانہ بنایا گیا، حملے میں ان کا ایک محافظ بھی شہید ہوا۔
حماس نے سربراہ کی شہادت کی تصدیق کرتے ہوئے کہا تھا ان کے سربراہ اسرائیلی حملے میں شہید ہوئے، وہ ان دنوں ایران کے صدر کی تقریب حلف برداری میں شرکت کے لئے ایران میں مقیم تھے۔
واضح رہے غزہ جنگ کے دوران حماس کے سربراہ کے خاندان کے درجنوں افراد شہید ہوچکے ہیں، جن میں انکے بھائی بیٹے بہو پوتے پوتیاں بھی شامل ہیں۔