حماس رہنما اور سابق فلسطینی وزیراعظم اسماعیل ہنیہ کی قطر کے دارالحکومت دوحہ میں تدفین کردی گئی۔
غیر ملکی ذرائع ابلاغ کے مطابق نماز جنازہ میں خالد مشعل، امیر قطر شیخ تمیم بن حمد، اسماعیل ہنیہ کے بیٹے، فلسطینی تنظیموں، الفتح، اسلامی جہاد اور دنیا بھر سے لوگ شریک ہوئے۔
مسجد امام محمد بن عبدالوہاب میں نماز جمعہ کے بعد اسماعیل ہنیہ کی نماز جنازہ ادا کی گئی، حماس کے شہید رہنماء اسماعیل ہنیہ کو دوحہ کے لوسیل قبرستان میں علامہ یوسف القرضاوی کے پہلو میں سپرد خاک کردیا گیا۔
حماس رہنما اسماعیل ہنیہ کی تصاویر اور فلسطینی پرچم اٹھائے سوگوار افراد کی بڑی تعداد شہید کے جنازے میں شریک ہوئی، نعروں کی گونج میں حماس رہنماء کی میت امام محمد بن عبدالوہاب مسجد میں لائی گئی۔
اسماعیل ہنیہ شہید نے آخری گفتگو میں کیا کہا تھا؟
واضح رہے کہ حماس کے شہید رہنماء اسماعیل ہنیہ کی نمازِ جنازہ گزشتہ روز تہران میں ادا کی گئی تھی، جس میں لاکھوں شہریوں نے شہید کو خراج عقیدت پیش کیا تھا۔