سیکیورٹی فورسز نے بنوں کنٹونمنٹ پر دہشتگردوں کا حملہ بروقت کارروائی کرتے ہوئے ناکام بنا کر شہر کو بڑی تباہی سے بچا لیا۔
آئی ایس پی آر کے مطابق بنوں کنٹونمنٹ پر گزشتہ روز 10 دہشت گردوں کے گروپ نے حملہ کیا لیکن سیکیورٹی فورسز نے بروقت کارروائی کرتے ہوئے یہ حملہ ناکام بنا دیا۔ اس خودکش حملے میں بنوں کنٹونمنٹ کی دیوار کا ایک حصہ مسمار ہوا۔
آئی ایس پی آر کا کہنا ہے کہ دہشت گردوں کے خودکش حملے میں 8 اہلکار شہید ہوئے جب کہ سیکیورٹی فورسز نے جان پر کھیلتے ہوئے تمام 10 دہشتگردوں کو ہلاک کر دیا۔
آئی ایس پی آر کے مطابق شہید ہونیوالوں میں پونچھ کے رہائشی نائب صوبیدار محمد شہزاد، وادی نیلم سے تعلق رکھنے والے حوالدار احمد شہید، ضلع خوشاب کے حوالدار ظل حسین شاہ اور ضلع لکی مروت کے لانس نائیک سبز علی خان شامل ہیں۔
اس کے علاوہ شامل شہید سپاہی اشفاق حسین کا تعلق ضلع مظفر آباد، شہید ارسلان اسلم ضلع بہاولپور، سپاہی سبحان مجید بلوچ مظفر آباد اور شہید سپاہی امتیاز خان کا تعلق ضلع کرک سے ہے۔
آئی ایس پی آر کے مطابق دہشت گرد حملہ حافظ گل بہادر گروپ کی جانب سے کیا گیا۔ یہ گروپ افغان سر زمین سے پاکستان میں دہشتگردانہ کارروائیاں کرا رہا ہے۔
پاکستان بارہا عبوری افغان حکومت سے ضروری اقدامات کرنے اور دہشتگردوں کو اپنی سر زمین استعمال کرنے سے روکنے کے لیے ان گروپس کے خلاف موثر کارروائی کرنے کا کہہ چکا ہے۔
آئی ایس پی آر کے جاری بیان میں کہا گیا ہے کہ مسلح افواج دہشتگردی کے خاتمے کیلیے پُرعزم ہے اور افغانستان سے درپیش خطرات سے نمٹنے کیلیے جو ضروری ہوا کریں گے۔