اسرائیلی فوج کی جانب سے غزہ کے ساتھ ساتھ لبنان میں بھی بربریت کا سلسلہ جاری ہے، لبنان کے شمالی علاقوں کو پہلی بار فضائی بمباری کا نشانہ بنایا گیا ہے، جس کے نتیجے میں 21 افراد کے شہید ہونے کی اطلاعات ہیں۔
عرب میڈیا کا کہنا ہے کہ اسرائیلی فوج نے کاز غرتا ڈسٹرکٹ میں ایطو ٹاؤن میں 4 منزلہ عمارت کو نشانہ بنایا، حزب اللّٰہ کے المنار ٹی وی چینل کے دفتر پر میزائلوں سے حملہ کیا گیا۔
واضح رہے کہ گزشتہ روز حزب اللہ کی جانب سے صیہونی فوج کے تربیتی مرکز پر کیے گئے ڈرون حملوں نے تباہی مچادی تھی۔
حزب اللہ کا اپنے بیان میں کہنا تھا کہ حیفہ کے جنوب میں بنیامینہ میں گولانی بریگیڈ کے ایک کیمپ پر خود کش ڈرونز سے حملے کیے ہیں۔
بیان میں کہا گیا کہ یہ حملہ غزہ کی پٹی میں ہمارے ثابت قدم فلسطینی عوام کی حمایت اور ان کی بہادر اور باوقار مزاحمت کی حمایت اور لبنان اور اس کے عوام کے دفاع میں کیا گیا ہے۔
بنیامینہ تل ابیب اور حیفہ کے درمیان واقع ہے اور اس کی آبادی تقریباً 16,000 افراد پر مشتمل ہے۔
اسرائیلی آرمی ریڈیو کا کہنا ہے کہ ڈرون حملے میں تین افراد مارے گئے جب کہ دیگر میڈیا رپورٹس میں زخمیوں کی تعداد 67 بتائی جارہی ہے۔
القسام بریگیڈ کے حملے میں متعدد اسرائیلی فوجی ہلاک و زخمی
اسرائیلی آرمی ریڈیو نے ایک ذریعے کے حوالے سے بتایا کہ حزب اللہ نے فضائی دفاعی نظام کو دھوکا دینے میں کامیابی حاصل کی اور ڈرون کو ڈھانپنے کے لیے میزائلوں کا ایک بیراج فائر کیا۔