شوبز انڈسٹری کی معروف اداکارہ جویریہ سعود نے ’بے بی باجی‘ کے سیٹ سے نئی تصویر شیئر کردی۔
اے آر وائی ڈیجیٹل کے ڈرامہ سیریل بے بی باجی میں جویریہ سعود ’عذرا‘ کا منفی کردار نبھا رہی ہیں، ان کی اداکاری کو مداحوں کی جانب سے خوب سراہا جارہا ہے، ڈرامے میں ان کے شوہر سعود قاسمی ’جمال‘ کے کردار میں موجود ہیں۔
انسٹاگرام پر جویریہ سعود نے سعود قاسمی اور سینئر اداکارہ ثمینہ احمد کے ساتھ تصویر شیئر کی۔
جویریہ سعود نے تصویر شیئر کرتے ہوئے کیپشن میں لکھا کہ ’بے بی باجی ہم آپ سے محبت کرتے ہیں۔‘
ڈرامہ سیریل بے بی باجی کی کاسٹ میں ثمینہ احمد، منور سعید، جویریہ سعود، سعود قاسمی، جنید جمشید نیازی، طوبیٰ انور، فضل حسین، عینا آصف، فائزہ خان ودیگر شامل ہیں۔
ڈرامے کی کہانی منصور احمد خان نے لکھی ہے جبکہ اس کی ہدایت کاری کے فرائض تحسین خان نے انجام دیے ہیں۔
گزشتہ دنوں جویریہ سعود نے ’اے آر وائی چیٹ ڈائریز‘ میں گفتگو کرتے ہوئے کہا تھا کہ ’عذرا سب کے گھروں میں موجود ہے اور ہر کوئی ڈرامے میں اپنے گھر کی عذرا کو دیکھ رہا ہوگا اور کہہ رہا ہوگا تم یہی کرتی ہو۔‘
جویریہ سعود کا کہنا تھا کہ ’مجھے لگ رہا تھا کہ خواتین کردار کی تعریف کریں گی لیکن بوڑھے، بچے، جوان سب کہہ رہے ہیں کہ آپ نے تباہی مچادی ہے۔‘
ان کا کہنا تھا کہ ’شاپنگ مال گئی تو ایک صاحب کی آواز آئی کہ ارے بھئی آپ نے کیا تباہی مچائی ہوئی ہے، بہت سے لوگ ایسے بھی ہیں جنہوں نے اب مقبولیت کے بعد ڈرامہ دیکھنا شروع کیا ہے۔‘