لاہور: نگران وزیراعلیٰ پنجاب نے جناح ہاؤس، سرکاری تنصیبات میں توڑ پھوڑ ،جلاؤ گھیراؤ کی تحقیقات کیلئے جے آئی ٹی بنانےکا فیصلہ کیا ہے۔
اے آر وائی نیوز کے مطابق نگران وزیر اعلیٰ پنجاب محسن نقوی کی زیر صدارت امن وامان کی صور تحال پرجائزہ اجلاس ہوا، اجلاس میں جناح ہاؤس، سرکاری تنصیبات میں توڑ پھوڑ ،جلاؤ گھیراؤ کی تحقیقات کیلئے جے آئی ٹی بنانےکا فیصلہ کیا گیا۔
نگران وزیراعلیٰ پنجاب کو آئی جی نے صوبے میں امن وامان کی صورتحال، شرپسندوں کیخلاف کارروائیوں پر بریفنگ دی۔
اجلاس میں ہدایت دی گئی کہ جے آئی ٹی واقعات کی تحقیقات کر کے جامع رپورٹ تیار کی جائے جسے حکومت کو پیش کی جائے گی بعد ازا توڑ پھوڑ والے تمام مقامات کی جیو فینسنگ کرائی جائے گی۔
جناح ہاؤس پر حملہ کرنے والے چند شرپسندوں کی شناخت کرلی گئی
نگران وزیر اعلیٰ پنجاب محسن نقوی نے تمام شرپسندوں کو قانون کی گرفت میں لانے کیلئے کارروائیاں مزید تیز کرنے کا حکم دیدیا۔
نگران وزیراعلیٰ نے کہا کہ شرپسندوں کیخلاف تمام کیس اے ٹی سی میں چلائے جائیں گے، انہوں نے محکمہ پبلک پراسیکیوشن کو تمام کیسوں کا فوری ٹرائل یقینی بنانے کی ہدایت جاری کردی۔
محسن نقوی کا کہنا تھا کہ کسی گناہ گار کو چھوڑیں گے نہیں اور بے گناہ کو پکڑیں گے نہیں، شواہد، ثبوتوں کیساتھ ہر شرپسند کو کٹہرے میں لایاجائےگا، جناح ہاؤس، سرکاری املاک پر حملہ کرنیوالے عبرتناک سزا سے نہیں بچ پائیں گے۔
نگران وزیر اعلیٰ پنجاب نے کہا کہ شرپسندوں کیخلاف زیرو ٹالرنس پالیسی اپنائی ہے، شرپسند عناصر کے مذموم عزائم ناکام بنانے کیلئے فورس الرٹ ہے۔
نگران وزیر اعلیٰ پنجاب محسن نقوی نے مزید کہا کہ 15 مئی کو تعلیمی ادارے کھول دیئے جائیں گے۔