سڈنی: بھارت کے خلاف آئی سی سی ٹیسٹ چیمپئن شپ کے فائنل سے قبل آسٹریلوی ٹیم کو دھچکا لگ گیا۔
آسٹریلوی کرکٹ ٹیم کے چیف سلیکٹر جارج بیلی کا کہنا ہے کہ فاسٹ بولر جوش ہیزل ووڈ بھارت کے خلاف ٹیسٹ چیمپئن کے فائنل سے باہر ہوگئے ہیں۔
انہوں نے کہا کہ جوش ہیزل ووڈ کو چیمپئن شپ کا فائنل کھلانا تھا لیکن ٹریننگ کے دوران اندازہ ہوا کہ وہ مکمل فٹ نہیں ہیں۔
جارج بیلی کا کہنا ہے کہ ٹیسٹ چیمپئن شپ کے فائنل کے لیے جوش ہیزل ووڈ کی جگہ مائیکل نیسر کو 15 رکنی اسکواڈ میں شامل کر لیا گیا ہے تاہم جوش ہیزل ووڈ انگلینڈ کے خلاف ایشز سیریز سے باہر نہیں ہوئے ہیں۔
واضح رہے کہ جوش ہیزل ووڈ انڈین پریمیئر لیگ (آئی پی ایل) کے دوران سائیڈ اسٹرین انجری کا شکار ہوئے تھے۔
یاد رہے کہ بھارت اور آسٹریلیا کے درمیان ٹیسٹ چیمپئن شپ کا فائنل 7 سے 11 جون تک اوول کے میدان میں کھیلا جائے گا۔