چیئرمین پی ٹی آئی کو سزا سنانے والے جج ہمایوں دلاور کی لندن روانگی کا معاملے پر یونیورسٹی آف ہُل کی دستاویزات سے متعلق اےآروائی نیوز حقائق سامنے لے آیا۔
ٹریننگ ورکشاپ کیلئے ابتدائی نامزدگیاں مئی 2023 میں بھجوائی گئیں۔ دستاویز کے مطابق 31 جولائی کو ہمایوں دلاور کی ٹریننگ میں شرکت کنفرم ہوئی، جج فیضان حیدرگیلانی کی عدم دستیابی پر ہمایوں دلاور کا نام شامل ہوا۔
ابتدائی فہرست میں جج ہمایوں دلاور کا نام شامل تھا تاہم جون میں ہمایوں دلاور سمیت 4 ججز کا نام ڈراپ ہوا، جج فیضان حیدر نے ویزہ اپلائی کیا تاحال اس کا فیصلہ نہیں ہوا۔
یونیورسٹی دستاویز کے مطابق پروگرام میں ایک نشست خالی رکھنا نامناسب ہو گا اس لیے جج ہمایوں دلاور کو متبادل کے طور پر منتخب کیا جا رہا ہے، 21 جون کے خط کے مطابق اسلام آباد سے 4 ججز کو چنا گیا منتخب ججوں میں زبیا چوہدری، کامران بشارت، شعیب بلال شامل تھے۔
حتمی طور پر 7جج ٹریننگ میں شرکت کیلئے لندن روانہ ہوئے، عابدہ سجاد ،صائمہ اقبال ،عائشہ شبیرٹریننگ کیلئےلندن گئیں۔ لندن جانے والوں میں جج ثاقب جواد، رضوان قریشی، صنم بخاری بھی شامل ہیں۔