ملتان کی سیشن عدالت نے پاکستان تحریک انصاف کے رہنما عامر ڈوگر کا 14 روزہ جوڈیشل ریمانڈ منظور کرلیا۔
سیشن کورٹ میں 9 مئی کو توڑ پھوڑ اور سرکاری املاک کو نقصان پہنچانے کے کیس کی سماعت ہوئی جس میں عامر ڈوگر کا جوڈیشل ریمانڈ دیا گیا۔ ان کے خلاف مختلف تھانوں میں مقدمات درج ہیں۔
26 مئی کو پولیس نے عامر ڈوگر کو گرفتار کیا تھا جبکہ اس سے قبل وہ عدالت سے فرار ہوگئے تھے۔ عامر ڈوگر کو شیر شاہ موٹروے انٹر چینج سے گرفتار کیا گیا تھا۔
عامر ڈوگر کو کچہ کھوہ پولیس نے عدالت میں پیش کیا تھا۔ ان کے خلاف تھانے میں دو مقدمات درج ہیں۔ عدالت نے جیسے ہی انہیں مقدمات میں ڈسچارج کیا تو پولیس نے پھر گرفتار کرنے کی کوشش کی۔
اس موقع پر وکلا نے پی ٹی آئی رہنما کو فرار کروا دیا۔ پولیس نفری نے کچہری کو گھیر میں لیے رکھا جبکہ ان کے وکیل شہباز چیمہ کی گرفتاری کیلیے چھاپے مارے گئے۔
پی ٹی آئی رہنما کو 12 مئی کے روز پولیس نے لاہور ہائی کورٹ کے باہر سے گرفتار کیا تھا۔ دو روز قبل جب انہیں رہائی ملی تو جیل سے باہر آتے ہی پولیس نے دوبارہ گرفتار کر لیا تھا۔