بلوچستان میں فائرنگ سے جے یو آئی کا رہنما قتل

بلوچستان کے ضلع نوشکی میں نامعلوم مسلح شخص کی فائرنگ سے جمعیت علمائے اسلام کا مقامی رہنما جاں بحق ہوگیا۔

پولیس نے بتایا کہ جے یو آئی رہنما کی شناخت میر ظہور نادینی کے نام سے ہوئی جس پر نوشکی بوائز کالج کے قریب فائرنگ کی گئی، حملہ آور فائرنگ کے بعد فرار ہوگئے۔

پولیس نے فائرنگ سے قتل کے واقعے کی تحقیقات شروع کر دی۔

رواں سال فروری میں بلوچستان کے علاقے قلعہ سیف اللہ میں جے یو آئی کے دفتر کے قریب دھماکے کے نتیجے میں 12 افراد جاں بحق اور متعدد افراد زخمی ہوگئے تھے۔ جے یو آئی امیدوار مولانا عبدالواسع کے انتخابی دفتر کے قریب دھماکا ہوا تھا جہاں کارکنوں کی بڑی تعداد دفتر میں موجود تھی۔

پولیس نے بتایا تھا کہ پی بی 3 سے امیدوار مولانا عبدالواسع دفتر میں موجود نہیں تھے۔ دھماکے کے بعد قانون نافذ کرنے والے اداروں نے علاقے کو گھیرے میں لے لیا تھا۔

اس سے قبل پشین کے پی بی 47 خانوزئی میں آزاد امیدوار اسفند یار کاکڑ کے انتخابی دفتر کے قریب دھماکا ہوا تھا جس میں 14 افراد جاں بحق اور 25 زخمی ہوئے تھے۔