جسٹس شفیع صدیقی نے چیف جسٹس سندھ ہائیکورٹ کے عہدے کا حلف اٹھالیا

کراچی : جسٹس شفیع صدیقی نے چیف جسٹس سندھ ہائیکورٹ کے عہدے کا حلف اٹھا لیا، گورنر سندھ کامران ٹیسوری نے ان سے عہدے کا حلف لیا۔

تفصیلات کے مطابق جسٹس شفیع احمد صدیقی کی بطور چیف جسٹس سندھ ہائیکورٹ حلف برداری کی تقریب ہوئی۔

تقریب میں سندھ ہائی کورٹ کے ججز، اٹارنی جنرل پاکستان، وزیرِ اعلیٰ سندھ آئی جی سندھ اور دیگر حکام شریک ہوئے، اس کے علاوہ تقریب میں سپریم کورٹ اور سندھ ہائی کورٹ کے سابق ججز نے بھی شرکت کی۔

جسٹس شفیع  نے سندھ ہائیکورٹ کے 27 ویں چیف جسٹس کی حیثیت سے حلف اٹھایا، گورنر سندھ کامران ٹیسوری نے ان سے عہدے کا حلف لیا۔

محمد شفیع صدیقی 12 اگست 1965ء کو پیدا ہوئے، انہوں نے بی ایس سی کے بعد ایل ایل بی کی ڈگری حاصل کی، انہوں نے 1992ء میں بطور ایڈووکیٹ ماتحت عدالتوں سے اپنے کریئر کا آغاز کیا۔

سال 1994ء میں بطور ہائی کورٹ ایڈووکیٹ انرول ہوئے، وہ 2008ء میں سپریم کورٹ میں ایڈووکیٹ کی حیثیت سے انرول ہوئے،انھوں نے 2012ء میں سندھ ہائی کورٹ کے جج کی حیثیت سے حلف اٹھایا تھا۔