اسلام آباد: الیکشن کمیشن کے سابق سیکریٹری کنور دلشاد کا کہنا ہے کہ آج کے بعد پاکستان تحریک انصاف (پی ٹی آئی) برائے نام رہ گئی اور پارٹی سے ختم ہوگئی۔
کنور دلشاد نے اے آر وائی نیوز سے گفتگو کرتے ہوئے پشاور ہائی کورٹ کے اُس فیصلے پر اظہارِ خیال کیا جس میں الیکشن کمیشن کی درخواست پر اس کا 22 دسمبر 2023 کو دیا گیا فیصلہ بحال کیا گیا۔
کنور دلشاد نے کہا کہ پی ٹی آئی کو پشاور ہائی کورٹ کے فیصلے سے نقصان پہنچا ہے، اگر آزاد امیدوار سے لڑیں گے تو بھی اس کا نقصان پی ٹی آئی کو ہی ہوگا۔
انہوں نے کہا کہ قومی اسمبلی میں آزاد امیدوار غیر جماعتی گروپ بنا کر بھی اکثریت دکھا سکتے ہیں، 9 جنوری کو ڈویژنل بینچ پی ٹی آئی کا معاملہ دیکھے گا، اگر ڈویژنل بینچ سے بھی پی ٹی آئی کو ریلیف نہ ملا تو معاملہ سپریم کورٹ جا سکتا ہے۔
سابق سیکریٹری الیکشن کمیشن نے کہا کہ خواتین کی مخصوص نشستوں سے پی ٹی آئی محروم ہوگئی، اس کو آج بہت نقصان پہنچا ہے، آج کے فیصلے کی روشنی میں پارٹی کی رجسٹریشن سے محروم ہوگئی۔
کنور دلشاد نے کہا کہ پی ٹی آئی کا الیکشن کمیشن کے ریکارڈ میں عمل دخل نہیں رہا، آزاد امیدوار کامیاب ہونے والے بھی کسی پارٹی میں شامل ہو جائیں گے۔
انہوں نے کہا کہ پارٹی کے نام پر ووٹ لے کر مفاد کے تحت کسی پارٹی میں شامل ہوں گے، یہاں دستور ہے آزاد امیدوار حکمران جماعت میں ہی شامل ہوتا ہے۔