لیجنڈری ہندوستانی کپتان کپل دیو نے حال ہی میں اس بارے میں اپنی رائے کا اظہار کیا ہے کہ اسٹار بلے باز ویرات کوہلی اور روہت شرما کو کب ریٹائر ہونا چاہیے؟
ویرات اور روہت ایک دہائی سے زیادہ عرصے سے تمام فارمیٹس میں ہندوستانی بلے بازی کا اہم مقام رہے ہیں تاہم ان دونوں نے آئی سی سی T20 ورلڈ کپ 2024 کی فتح میں ملک کی قیادت کرنے کے بعد T20I کرکٹ سے ریٹائرمنٹ کا اعلان کیا۔
جب سے وہ T20I سے ریٹائر ہوئے ہیں شائقین یہ سوچ رہے ہیں کہ کیا وہ اپنی بڑھتی عمر کو دیکھتے ہوئے دوسرے فارمیٹس سے بھی ریٹائرمنٹ پر غور کر رہے ہیں۔
کپل دیو نے ایک بھارتی اسپورٹس ویب سائٹ کو انٹرویو دیتے ہوئے کہا کہ 26 اور 34 کے درمیان کی عمر کسی بھی کرکٹر کے لیے اہم وقت ہے اور اس عمر سے آگے جدید دور کی کرکٹ میں برقرار رہنے کے لیے کھلاڑی کو چوٹی کی فٹنس برقرار رکھنی چاہیے۔
کپل نے کہا کہ میری رائے میں، 26 سے 34 سال کے درمیان کا عرصہ آپ کا اہم ہے اور اس کے بعد کھلاڑیوں کی فٹنس ان کی لمبی عمر کو یقینی بنائے گی۔ انہوں نے روی شاستری اور سچن ٹنڈولکر کی مثالوں کا حوالہ دیتے ہوئے مزید کہا کہ ہر کھلاڑی مختلف طریقے سے بنایا گیا ہے اور یہ فرد کا اپنا فیصلہ ہے کہ کب ریٹائر ہونا ہے۔
انہوں نے مزید کہا کہ روی شاستری بہت کم عمری میں ریٹائر ہو گئے تھے جبکہ سچن ٹنڈولکر کا دور طویل تھا اس لیے یہ مکمل طور پر فرد پر منحصر ہے کہ وہ اپنی زندگی کا فیصلہ کریں۔
کپل دیو نے اس بات کا اعادہ کیا کہ ویرات کوہلی اور روہت شرما کو جب تک ان کی فٹنس اجازت دیتی ہے کھیلنا چاہیے۔