ARYNews.tv | Urdu – Har Lamha Bakhabar

’آپ کو شرم آنی چاہیے‘ کپل شرما بھارتی ایئرلائن پر برس پڑے

کپل شرما

Written by

ویب ڈیسک

in

,

معروف بھارتی کامیڈین کپل شرما انڈیگو کی پرواز میں ڈیڑھ گھنٹے سے زائد تاخیر پر برس پڑے۔

سماجی رابطے کی ویب سائٹ ایکس (ٹوئٹر) پر پوسٹ شیئر کرتے ہوئے کامیڈین کپل شرما نے پرواز میں تاخیر کی وجہ بھی بتائی جس پر صارفین حیران رہ گئے۔

انہوں نے بھارتی ایئر لائن کی سروس پر مایوسی کا اظہار کیا اور ایئر لائن کو مخاطب کرتے ہوئے لکھا کہ ’پہلے آپ نے ہمیں بس میں 50 منٹ تک انتظار کروایا اور اب آپ کی ٹیم کہہ رہی ہے کہ پائلٹ ٹریفک میں پھنس گیا ہے‘۔

کپل شرما نے پرواز میں تاخیر کی وجہ جان کر غیر یقینی کا اظہار کرتے ہوئے لکھا کہ کیا سچ میں؟

انہوں نے مذکورہ ایئر لائن میں دوبارہ سفر نہ کرنے کا تہیہ کرتے ہوئے مزید لکھا کہ ’ہمیں رات 8 بجے تک ٹیک آف کرنا تھا تاہم اب 09:20 ہو چکے ہیں اور آپ کے پائلٹ کا کچھ اتا پتہ نہیں ہے، اسے تو اس وقت کاک پٹ میں ہونا چاہیے تھا، کیا آپ کو لگتا ہے کہ یہ 180 مسافر دوبارہ انڈیگو میں سفر کریں گے؟ یقیناً کبھی نہیں، بے شرم‘۔

کپل شرما نے مذکورہ پوسٹ کے تقریباً آدھے گھنٹے بعد دوباہ پوسٹ شیئر کی اور تازہ صورتِ حال سے آگاہ کیا۔

انہوں نے طیارے سے اترتے مسافروں کی ایک ویڈیو شیئر کی اور ساتھ میں لکھا کہ ’اب ایئر لائن کا عملہ تمام مسافروں کو یہ کہہ کر طیارے سے اُتار رہا ہے کہ وہ ہمیں دوسرے طیارے میں منتقل کریں گے لیکن ہمیں ایک بار پھر ٹرمینل پر واپسی جا کر سیکیورٹی چیک کے عمل سے دوبارہ گزرنا پڑے گا‘۔

کامیڈین نے تقریباً ایک گھنٹے بعد ایک اور ویڈیو شیئر کی جس میں پریشان حال مسافروں کو ایئر لائن کی سروس پر مایوسی کا اظہار اور احتجاج کرتے ہوئے دیکھا جا سکتا ہے۔

انہوں نے مذکورہ ویڈیو کے کیپشن میں ایئر لائن سے مخاطب ہو کر لکھا کہ آپ کو شرم آنی چاہیے، کئی لوگ آپ کی وجہ سے متاثر ہوئے ہیں، جھوٹ، جھوٹ اور صرف جھوٹ، پرواز میں کچھ ضعیف العمر افراد بھی موجود ہیں جو وہیل چیرز پر ہیں اور ان کی حالت اچھی نہیں ہے۔

بعدازاں انڈیگو انتظامیہ نے کپل شرما کی پوسٹ پر جواب دیا کہ ’ہمیں پرواز کی تاخیر پر افسوس ہے اور ہم اگلی بار آپ کی خدمت کرنے کے خواہشمند ہیں۔

More posts