کراچی : بارش میں گرنے والا 150 سالہ قدیم درخت دوبارہ لگا دیا گیا ، حالیہ مون سون بارشوں اور تیز ہواؤں کی وجہ سے قصر ناز کراچی میں یہ درخت گر گیا تھا۔
تفصیلات کے مطابق وزیراعلیٰ سندھ کی ہدایت پر دو دن جاری ریسکیو آپریشن کامیابی سے مکمل ہوا جس میں محکمہ جنگلات سندھ کی ٹیم نے قدیم 150 سالہ برگد کے درخت کو محفوظ مقام پر منتقل کیا اور وزیر اعلیٰ کو آپریشن کی مکمل تفصیلات سے آگاہ کیا گیا۔
ریسکیو آپریشن کے دوران نیم اور کامنی کے دیگر درختوں کو بھی محفوظ کیا گیا اور درخت کو کرین کے ذریعے قریب ہی بہتر مقام پر دوبارہ لگایا گیا۔
محکمہ جنگلات سندھ کی جانب سے کہا گیا ہے کہ درخت نے دوبارہ زندگی کے نئے سفر کا آغاز کر دیا ہے۔
وزیر اعلیٰ مراد علی شاہ نے محکمہ جنگلات سندھ کی ٹیم کی کاوشوں کو سراہا اور کہا کہ قدیم درخت ماضی و حال کے تعلق کی علامت ہیں۔ انہوں نے نوجوانوں کو پیغام دیا کہ تاریخی درختوں کی اہمیت اور حفاظت کے لیے ہمیشہ کوشاں رہیں۔
حالیہ مون سون بارشوں اور تیز ہواؤں کی وجہ سے قصر ناز کراچی میں یہ درخت گر گیا تھا، محکمہ جنگلات کے مطابق درخت کی جڑوں کو فنگس اور دیمک کے حملے سے نقصان پہنچا، جس کی بنیادی وجہ پانی کی کمی تھی۔
وزیر اعلیٰ سندھ نے کہا کہ برگد کے قدیم درخت کی بحالی موسمیاتی حوالے سے بھی اہم پیش رفت ہے۔