کراچی میں والد کے جنازے پر سعودی عرب سے آنے والے نوجوان کو ڈکیتی مزاحمت پر قتل کرنے والے ملزم کو پولیس نے گرفتار کرلیا۔
پولیس کے مطابق ملزم پرویز نے اورنگی ٹاؤن مٰں ڈکیتی مزاحمت پر جبران کو قتل کیا تھا، گرفتار ملزم نے گزشتہ رات ڈکیتی کی ایک اور واردات بھی کی تھی جس میں مزاحمت پر ڈھائی سال کے بچے کو زخمی کردیا تھا۔
تفتیشی حکام کے مطابق کمسن بچے کے والد نے ملزم پرویز کو شناخت کرلیا۔
پولیس کا کہنا ہے کہ ملزم نے دوران تفتیش نوجوان جبران کو بھی قتل کرنے کا انکشاف کیا، ملزم نے تفتیش میں کئی وارداتوں کا اعتراف کیا ہے۔
واضح رہے کہ گزشتہ روز اورنگی ٹاؤن ایک نمبر کے قریب ڈکیتی مزاحمت پر فائرنگ سے نوجوان کے قتل کا واقعہ پیش آیا تھا۔
یہ پڑھیں: والد کے انتقال پر سعودیہ سے کراچی آنے والا نوجوان ڈاکوؤں کے ہاتھوں قتل
ریسکیو حکام کے مطابق مقتول کی شناخت 24 سالہ جبران ولد جمعہ کے نام سے ہوئی ہے جو سعودی عرب سے واپس آیا تھا۔
علاقہ مکینوں نے میڈیا کو بتایا تھا کہ مقتول جبران سعودی عرب میں اہلخانہ کی کفالت کیلئے ملازمت کرتا تھا، جاں بحق نوجوان جبران کے والد کا گزشتہ ہفتے انتقال ہوا تھا۔
والد کے انتقال پر مقتول سعودی عرب سے کراچی آیا تھا، ملزمان نے موبائل فون چھیننے کے دوران مزاحمت پر فائرنگ کی اور قتل کرکے فرار ہوگئے تھے۔