کراچی کے علاقے انچولی میں جے ڈی سی کے سربراہ ظفر عباس کی گاڑی کی ٹکر سے زخمی نوجوانوں کی حالت تشویشناک ہوگئی۔
پولیس حکام کے مطابق حادثے کی ذمہ دار گاڑی جے ڈی سی سربراہ ظفر عباس کے نام پر رجسٹرڈ ہے، حادثے کے دوران گاڑی کی نمبر پلیٹ گری جبکہ سوار افراد فرار ہوگئے۔
ظفر عباس اپنی ٹیم کے ساتھ موقع پر پہنچے اور نوجوانوں کے علاج کی یقین دہانی کروائی۔
ذرائع کے مطابق ظفر عباس کی ٹیم نے ویڈیو بنانے والوں کے موبائل چھیننے کی کوشش کی۔
دوسری جانب کراچی کے علاقے ڈیفنس، نارتھ ناظم آباد اور منگھوپیر میں تین مختلف ٹریفک حادثات ہیش آئے۔ لینڈ کروزر اور ٹرکوں کے تصادم میں موٹرسائیکل سوار اور ایک راہگیر خاتون جاں بحق جبکہ ایک ڈرائیور زخمی ہوگیا۔
ڈیفینس حادثہ فیز ایٹ خیابان رومی میں انتہائی تیز رفتاری کے نتیجے میں پیش آیا، جس سے لینڈ کروزر اور ٹرک کو نقصان پہنچا۔ پولیس اور متعلقہ انتظامیہ جائے وقوعہ پر پہنچی، ٹرک اور گاڑی ہٹانے کے لیے ہیوی مشینری طلب کی گئی۔ ٹریفک پولیس کے مطابق حادثہ لینڈ کروزر اور سی بی سی کچرے کے ٹرک کے درمیان ٹکرانے سے پیش آیا تھا۔
زخمی ڈرائیور کو فوری اسپتال منتقل کردیا گیا جبکہ دونوں گاڑیاں لفٹر کے ذریعے ساحل تھانے منتقل کردی گئی ہیں۔
دوسری جانب نارتھ ناظم آباد حیدری مارکیٹ کے قریب ٹرک کی ٹکر سے موٹر سائیکل سوار جاں بحق اور منگھوپیر کے قریب ٹرک کی ٹکر سے راہگیر خاتون جاں بحق ہوگئیں۔