کراچی اور لاہور چیمبر آف کامرس نے آج ہڑتال اور کاروباری مراکز بند رکھنے کا اعلان کردیا۔
کراچی چیمبر آف کامرس کے صدر جاوید بلوانی نے کہا کہ کراچی میں آج کاروباری مراکز بند رہیں گے، مسئلہ حل نہ ہوا تو احتجاج ہوگا۔
جاوید بلوانی نے کہا کہ حکومتی ٹیم کو تحریری طور پر یقین دہانی کروانے کا کہا لیکن تحریری طور پر کچھ نہیں دیا گیا، آئندہ اجلاس میں بھی تحریری کچھ نہیں دیا تو دوبارہ ہڑتال کریں گے۔
انہوں نے کہا کہ ہفتے میں ایک اور دو دن بھی ہڑتال کرسکتے ہیں، مطالبات نہ مانے گئے تو پورے ہفتے بھی ہڑتال کی جاسکتی ہے۔
کراچی چیمبر کے صدر نے کہا کہ کراچی سمیت ملک بھر میں پرامن ہڑتال ہوگی۔
صدر لاہور چیمبر میاں ابو ذر شاد نے بھی آج ہڑتال کا اعلان کیا ہے، ان کا کہنا ہے کہ آج تاجروں کے احتجاج میں شرکت کریں گے، تاجروں کی مختلف تنطیمیں کل ہڑتال کریں گی۔
انہوں نے کہا کہ حکومت سے اب وعدے نہیں عملدرآمد چاہیے۔
واضح رہے کہ قبل ازیں، فیڈریشن آف پاکستان چیمبر آف کامرس اینڈ انڈسٹری (ایف پی سی سی آئی) نے کہا تھا کہ ملک بھر کی بزنس کمیونٹی نے فیصلہ کیا ہے کہ ہڑتال نہیں کی جائے گی۔
دریں اثنا، سیالکوٹ، ملتان، راولپنڈی اور گوجرانولہ چیمبر نے 19 جولائی (کل) کی ہڑتال موخر کرنے کا اعلان کر دیا۔
اسی طرح راولپنڈی اور گوجرانولہ چیمبرز آف کامرس نے بھی ہڑتال نہ کرنے کا اعلان کیا۔ واضح رہے کہ تاجر برادری حکومت نے فنانس ایکٹ کے آرٹیکل 37 اے کے خلاف ہڑتال کررہی ہے۔