کراچی: حکومت کی اتحادی جماعت متحدہ قومی موومنٹ (ایم کیو ایم) پاکستان نے شہر قائد میں ایک ہفتے کے دوران 2 بار بجلی کے بریک ڈاؤن پر وزیراعظم سے نوٹس لینے کا مطالبہ کردیا۔
اے آر وائی نیوز کے مطابق ایم کیو ایم کے اراکین قومی اسمبلی نے کراچی میں ایک ہفتے کے دوران 2 بار بجلی کے بریک ڈاؤن پر کے الیکٹرک کی کارکردگی پر تشویش کا اظہار کیا۔
ایم کیو ایم کے اراکین نے وزیراعظم، وزیرتوانائی اور نیپرا سے مطالبہ کیا کہ وہ کے الیکٹرک کا قبلہ درست کرے اور کے الیکٹرک کی کارکردگی کو 21 ویں صدقی کے تقاضوں سے ہم آہنگ کرے۔
ایم کیو ایم کے اراکین کا کہنا تھا کہ کے الیکٹرک آج بھی 20ویں صدی کے فرسودہ نظام سے بجلی کی ترسیل کا نظام چلا رہی ہے اور بھاری ٹیرف، زائد بلنگ کے ذریعے شہریوں سے اربوں روپے کما رہی ہے۔
مزید پڑھیں: کراچی میں بجلی کی لوڈ شیڈنگ کا دورانیہ 15 گھنٹے تک جانے کا امکان
یہ بھی پڑھیں: کراچی میں بجلی کا بڑا بریک ڈاؤن، نصف شہر کو بجلی کی فراہمی معطل
اراکین قومی اسمبلی نے کہا کہ شدید گرمی، حبس یا بارش کی پہلی بوند پڑتے ہی کے الیکٹرک کے سیکڑوں فیڈرز ٹرپ کر جاتے ہیں، فالٹ اور لوڈ شیڈنگ کے نام پر علاقوں کی بجلی کئی کئی گھنٹے بند رکھی جاتی ہے۔
ایم کیو ایم کے اراکین نے دعویٰ کیا کہ کے الیکٹرک صارفین سے جو خطیر رقم جمع کرتی ہے وہ کرتا دھرتاؤں کی جیبوں میں جاتی ہے، اس لیے سسٹم میں کوئی بہتری نہیں آئی بلکہ نظام ہر گزرتے دن کے ساتھ خراب ہورہا ہے۔