کراچی کے علاقے بن قاسم میں فائرنگ سے اے ایس آئی محمد خان ابڑو جاں بحق ہوگیا۔
اے آر وائی نیوز کے مطابق پولیس حکام کا کہنا ہے کہ اے ایس آئی محمد خان ابڑو کو اسٹیل ٹاؤن میں گھر کے باہر گولیاں ماری گئیں۔
پولیس کے مطابق مقتول اے ایس آئی اسٹیل ٹاؤن تھانے میں تعینات تھے۔
پولیس حکام کے مطابق محمد خان ابڑو کو شدید زخمی حالت میں اسپتال منتقل کیا گیا جہاں وہ زخموں کی تاب نہ لاتے ہوئے دم توڑ گئے۔
تفتیشی حکام کے مطابق محمد خان ابڑو، پولیس افسر جاوید ابڑو کے بھائی ہیں۔
پولیس کی بھاری نفری موقع پر پہنچ گئی اور کرائم سین یونٹ کی جانب سے تفتیش کا عمل شروع کردیا گیا ہے، ابتدائی تحقیقات مکمل ہونے کے بعد لاش کو پوسٹ مارٹم کے لیے اسپتال منتقل کیا جائے گا۔
بعدازاں لواحقین نے بتایا کہ شہید اے ایس آئی کے خلاف گزشتہ روز اسٹیل ٹاؤن تھانے میں مقدمہ درج ہوا تھا، وہ عدالت سے بھائی کے ہمراہ گھر واپس آیا تھا۔
لواحقین کے مطابق اے ایس آئی بڑے بھائی جاوید کو گھر چھوڑ کر اپنے گھر کی جانب گیا تھا، وہ جیسے ہی گاڑی سے اترا ملزمان نے فائرنگ کردی، شہید اے ایس آئی چار بچوں کا باپ تھا۔
واضح رہے کہ اپریل میں اولڈ سٹی ایریا رنچھورلائن جوبلی مارکیٹ کے قریب موٹر سائیکل سوار نامعلوم مسلح ملزمان کی فائرنگ سے پولیس اہلکارشہید ہو گیا تھا۔
شہید پولیس اہلکار چاکیواڑا تھانے میں تعینات تھا اور صفورا چوک کے قریب کا ریائشی تھا۔
فائرنگ کے واقعے سے قبل شہید پولیس اہلکار بریانی پارسل کروا رہا تھا مسلح ملزمان شہید پولیس اہلکار کا اسلحہ چھین کر فرار ہوگئے تھے۔