کراچی والے ہوجائیں ہوشیار! سڑک پر کچرا پھینکنے والے اب جیل جائیں گے۔
تفصیلات کے مطابق میٹروپولیٹن کارپوریشن نے صفائی کی صورتحال کو بہتر بنانے کے لیے نیا اقدام کیا جس میں ریسٹورنٹس اور کاروباری اداروں کو کچرا پھینکنے پر سندھ لوکل گورنمنٹ ایکٹ کے تحت نوٹس جاری کردیا گیا ہے۔
میئر کراچی مرتضی وہاب نے کہا ہے کہ ریسٹورانٹس کو نوٹس جاری کئے جا چکے ہیں، سڑکوں، فٹ پاتھوں پر کوڑا کرکٹ یا سامان رکھنے پر پچاس ہزار جرمانہ ہوگا، میونسپل انسپکٹرز قانون کے تحت فوری نوٹسز جاری کریں گے اور خلاف ورزی کرنے والوں کو 5 لاکھ جرمانہ یا 3 سال قید کا سامنا ہوسکتا ہے۔
میئر کراچی نے کہا کہ بلدیہ عظمیٰ کراچی کے میونسپل انسپکٹرز قانون کے مطابق کارروائی کریں گے، کے ایم سی شہریوں کو صاف ستھرا ماحول فراہم کرنے کیلئے متحرک ہے۔
انہوں نے کہا کہ فاسٹ فوڈ سمیت 3 ہوٹلوں کو فٹ پاتھ اور عوامی مقامات پر کچرا پھینکنے پر نوٹس جاری کیا گیا ہے، بلدیہ عظمیٰ کراچی کا کاروباری اداروں، ریسٹورنٹس کیخلاف آپریشن جاری ہے۔