کراچی: شہر قائد کے علاقے پہلوان گوٹھ میں پسند کی شادی کرنے پر بھائی نے فائرنگ کر کے بہن کو زخمی اور بہنوئی کو قتل کر دیا۔
تفصیلات کے مطابق کراچی کے علاقے گلستان جوہر پہلوان گوٹھ میں فائرنگ سے صفدر نامی ایک شخص جاں بحق ہو گیا جب کہ اس کی بیوی عذرا شدید زخمی ہو گئی۔
پولیس حکام کا کہنا ہے کہ واقعہ غیرت کے نام پر قتل کا معلوم ہوتا ہے، فائرنگ کرنے والا لڑکی کا بھائی ہے، ملزم عباس فائرنگ کر کے موقع سے فرار ہو گیا، جب کہ واقعے سے متعلق تحقیقات جاری ہیں۔
زخمی لڑکی کو سر پر گولی لگی ہے جس کے باعث وہ شدید زخمی ہے، عذرا کی حالت تشویش ناک بتائی جا رہی ہے، جو جناح اسپتال میں زیر علاج ہے، پولیس کا کہنا ہے کہ مقتول صفدر کا تعلق ملتان سے تھا اور وہ ہوٹل میں ویٹر کا کام کرتا تھا۔
معلوم ہوا ہے کہ ایک ماہ قبل شادی کرنے والے میاں بیوی کو لڑکی کے گھر والوں نے دعوت پر بلایا تھا، جہاں لڑکی کے بھائی عباس نے بہن اور بہنوئی پر فائرنگ کی، جس سے مقتول صفدر موقع پر ہی دم توڑ گیا، جب کہ عذرا سر میں گولی لگنے سے شدید زخمی ہو گئی، فائرنگ کے بعد عباس موقع سے فرار ہو گیا۔
پولیس حکام کے مطابق پولیس کو جائے وقوعہ سے 30 بور کے 3 خول ملے ہیں، ملزم عباس رکشہ ڈرائیور ہے جس کی تلاش کی جا رہی ہے۔