کراچی(15 اگست 2025): شہر میں بے لگام ڈمپر نے ایک اور گھر میں صف ماتم بچھادی، سی وی سے واپس آنے والے میاں بیوی جاں بحق ہوگئے۔

تفصیلات کے مطابق یہ افسوسناک واقعہ کراچی میں ایم ٹی خان روڈ مائی کلاچی کے قریب پیش آیا ہے جہاں ڈمپر کی زد میں آکر دو افراد میاں بیوی جاں بحق ہوگئے۔

ریسکیو حکام کے مطابق یہ حادثہ ڈمپر کی موٹر سائیکل کو ٹکر کے باعث پیش آیا ہے، حادثے میں موٹر سائیکل سوار مرد اور خاتون جاں بحق ہوئے ہیں جن کی شناخت مہر اور بلال کے ناموں سے ہوئی ہے۔

حکام کا مزید بتانا ہے کہ جاں بحق ہونیوالے میاں بیوی ہیں اور اورنگی ٹاؤن کے رہائشی ہیں، لواحقین دونوں میاں بیوی سی ویو سے واپسی پر ڈمپر  کی زد میں آئے ہیں۔

مزید پڑھیں : راشد منہاس روڈ حادثہ، 2 تھانوں کے ایس ایچ اوز معطل کر دیے گئے

واضح رہے کہ کراچی میں بے لگام ڈمپروں کا معاملہ ایک سنگین مسئلہ ہے جو شہریوں کی جان و مال کے لیے خطرہ بنا ہوا ہے، حالیہ اطلاعات کے مطابق تیز رفتار ڈمپروں کے باعث متعدد المناک حادثات پیش آئے ہیں۔

جن میں قیمتی جانیں ضائع ہوئیں، اگست 2025 میں فیڈرل بی ایریا، راشد منہاس روڈ پر لکی ون مال کے قریب ایک ڈمپر نے موٹرسائیکل سوار بہن بھائی، 22 سالہ ماہ نور اور 14 سالہ احمد رضا کو کچل دیا تھا، جس سے دونوں جاں بحق ہوگئے جبکہ ان کے والد شدید زخمی ہوئے۔ اس واقعے کے بعد مشتعل شہریوں نے 6 سے 7 ڈمپروں کو آگ لگا دی اور ڈرائیور پر تشدد کیا، جسے بعد میں پولیس نے حراست میں لے لیا۔