کراچی : پولیس وردی پہن کر وارداتیں کرنے والے ملزم کو گرفتار کرلیا گیا ، گرفتار ملزم نے دوران تفتیش اہم انکشافات کئے۔
تفصیلات کے مطابق کراچی میں ڈاکووں نے واردات کرنے کا انوکھا طریقہ اپنا لیا ، پولیس سے بچنے کے لئے خود پولیس اہلکار کا روپ دھار کر لوٹ مار شروع کردی۔
ملیر سٹی پولیس نے خفیہ اطلاع پر کارروائی کر کے ڈکیت گینگ کا پولیس وردی پہنا کارندہ اسلحہ سمیت گرفتار کرلیا۔
گرفتار ملزم موسیٰ نے اے آر وائی نیوز سے گفتگو میں سنسنی خیز انکشافات کیے اور بتایا کہ پولیس وردی پہن کر وارداتیں کرنے کا آئیڈیا گینگ کے ساتھیوں نے دیا۔
ملزم کا کہنا تھا کہ ہماراگینگ چار سے پانچ ملزمان پر مشتمل ہے، میں پولیس وردی پہن کر بینک اور منی ایکس چینج کے باہر ریکی کرتا ہوں۔
گرفتار ملزم نے مزید بتایا کہ پولیس وردی کے ساتھ میرے پاس اسلحہ بھی موجود ہوتا ہے، شہری جیسے ہی رقم لیکر نکلتے ہیں، میں ساتھیوں کو فون سے اطلاع دیتا ہوں اور میرے ساتھی شہری کا تعاقب کرکے اسلحہ کے زور پر لوٹ لیتے ہیں۔
پولیس کا کہنا ہے کہ ملزم سے پولیس وردی اور اسلحہ برآمد ہوا ہے اور ملزم کا کرمنل ریکارڈ موجود ہے تاہم گینگ کے دیگر ساتھیوں کی تلاش جاری ہے، ملزم ساتھیوں کے ہمراہ لوٹ کرتا تھا اور پہلے بھی گرفتار ہوکر جیل جا چکا ہے۔