کراچی میں بارش کی پیشگوئی پر متضاد دعوے سامنے آگئے

کراچی میں بارش کی پیشگوئی پر متضاد دعوے سامنے آگئے

کراچی : شہر قائد میں بارش کی پیشگوئی کے حوالے سے این ڈی ایم اے اور محکمہ موسمیات کے بیانات میں تضاد سامنے آگیا۔

تفصیلات کے مطابق محکمہ موسمیات کی جانب سے کراچی کے موسم کی صورتحال کے حوالے سے کہا گیا ہے کہ شہر میں رواں ہفتے تیز بارش کا کوئی امکان نہیں، تاہم صبح اور رات کے اوقات میں ہلکی بوندا باندی ہوسکتی ہے۔

محکمہ موسمیات کا کہنا تھا کہ آج کراچی کا موسم جزوی ابر آلود رہے گا، جبکہ تیز دھوپ کے ساتھ موسم گرم و مرطوب ہوگا۔ شہر میں نمی کا تناسب زیادہ ہونے کے باعث گرمی کی شدت معمول سے زیادہ محسوس کی جا رہی ہے اور زیادہ سے زیادہ درجہ حرارت 34 ڈگری سینٹی گریڈ تک جانے کا امکان ہے۔

خیال رہے نیشنل ڈیزاسٹر منیجمنٹ اتھارٹی (این ڈی ایم اے) نے کراچی سمیت سندھ بھر میں 30 اگست سے 2 ستمبر تک بارشوں کا امکان ظاہر کیا تھا۔

مزید پڑھیں : کراچی کے لیے نیا الرٹ جاری: شدید بارشوں اور اربن فلڈنگ کی پیشگوئی

این ڈی ایم اے کی جانب سے جاری الرٹ میں کراچی کے علاوہ حیدرآباد، ٹھٹھہ، بدین، سجاول، تھرپارکر، سکھر، گھوٹکی، لاڑکانہ، جیکب آباد، کشمور اور دادو سمیت دیگر علاقوں میں بھی اسی دوران بارش کا امکان ظاہر کیا گیا ہے۔

نیشنل ڈیزاسٹر منیجمنٹ اتھارٹی نے کراچی میں شدید بارشوں کے باعث اربن فلڈنگ کا خدشہ بھی ظاہر کیا تھا۔