کراچی میں جشنِ آزادی کا سب سے بڑا ایونٹ ، آج رات کون کون سے راستے بند ہوں گے؟

کراچی: جشن آزادی اور معرکہ حق کے موقع پر  میں نیشنل اسٹیڈیم میں میوزیکل نائٹ کے حوالے سے خصوصی ٹریفک پلان جاری کردیا گیا۔

تفصیلات کے مطابق کراچی میں جشن آزادی اور معرکہ حق کی خوشی میں نیشنل اسٹیڈیم میں میوزیکل نائٹ کا انعقاد کیا جا رہا ہے، ٹریفک پولیس نے اس موقع پر خصوصی ٹریفک پلان اور پارکنگ کے انتظامات کی تفصیلات جاری کر دی ہیں۔

ٹریفک پولیس نے بتایا کہ وہ گاڑیاں جنہیں اسٹیکر جاری ہوئے ہیں، وہ نیشنل اسٹیڈیم کے گیٹ نمبر 1 اور 11 سے داخل ہوں گی۔

تقریب میں آنے والے شہری ایکسپو سینٹر اور چائنا گراونڈ میں پارکنگ کر سکیں گے جبکہ انہیں شٹل سروس کے ذریعے نیشنل اسٹیڈیم پہنچایا جائے گا۔

ٹریفک پولیس نے شہریوں سے کہا ہے کہ نیشنل اسٹیڈیم اور سر شاہ سلیمان روڈ پر متوقع ٹریفک کے دباؤ سے بچنے کے لیے متبادل راستے اختیار کریں۔ بس، منی بس اور دیگر کمرشل گاڑیوں کو متبادل راستوں کی جانب بھیجا جائے گا اور ہر قسم کی ہیوی ٹریفک کا داخلہ ممنوع ہوگا۔

شہریوں سے درخواست کی گئی ہے کہ وہ اپنی گاڑیاں اور موٹر سائیکلیں سروس روڈ پر نہ کھڑی کریں اور قانون نافذ کرنے والے اداروں کے ساتھ مکمل تعاون کریں تاکہ تقریب کے دوران آمد و رفت آسان اور محفوظ ہو۔