کراچی: جامعہ کراچی میں اوپن میرٹ اور مخصوص نشستوں کی بنیاد پر ہونے والے داخلوں کے لیے فارم جمع کرانے کی تاریخ میں ایک دن کی توسیع کر دی گئی ہے۔
انچارج ڈائریکٹوریٹ آف ایڈمیشنز جامعہ کراچی ڈاکٹر صائمہ اختر کے مطابق اوپن میرٹ اور مخصوص نشستوں (Reserved Seats) کی بنیاد پر ہونے والے داخلوں کے لیے فارم جمع کرانے کی تاریخ میں ایک دن کی توسیع کر دی گئی ہے۔
اب داخلہ فارم 29 دسمبر 2021 تک جمع کرائے جا سکتے ہیں۔
مخصوص نشستوں میں اسپورٹس، کراچی یونیورسٹی ایمپلائز، معذور افراد (اسپیشل پرسنز)، آرمڈ فورسز، وکلا کے بچے، فاٹا، شمالی علاقہ جات و آزاد جموں کشمیر، اندرون سندھ اور بلوچستان کی نشستیں شامل ہیں۔
سالانہ جلسہ تقسیم اسناد میں شرکت
جامعہ کراچی کے رجسٹرار پروفیسر ڈاکٹر عبدالوحید کے مطابق سالانہ جلسہ تقسیم اسناد 2020-2021 میں شرکت کے لیے رجسٹریشن فارم جمع کرانے کی تاریخ میں 14 جنوری 2022 تک توسیع کر دی گئی ہے۔
رجسٹریشن کے لیے درخواست فارم جامعہ کراچی کی ویب سائٹ www.uok.edu.pk پر دستیاب ہیں، رجسٹریشن فارم کی متعلقہ شعبہ جات کے صدور، ڈائریکٹرز اور جامعہ کراچی کے سلور جوبلی گیٹ پر واقع ڈپٹی رجسٹرار اکیڈمک کے کاؤنٹر سے تصدیق کرائی جائے گی۔
جامعہ کراچی کے سلور جوبلی گیٹ پر واقع بینک الفلاح کے برانچ پر 7500 روپے کے فیس واؤچر کی ادائیگی کے بعد یہ رجسٹریشن فارم مع فیس واؤچر، صبح 10 بجے تا دوپہر ایک تک (جمعہ 12:00 بجے تک) اولڈ ایڈمنسٹریشن بلاک فرسٹ فلور ڈپٹی رجسٹرار اکیڈمک آفس میں جمع کرایا جا سکتا ہے۔
واضح رہے کہ فیس واؤچر جامعہ کراچی کے سلور جوبلی گیٹ پر واقع بینک الفلاح کے برانچ سے حاصل کیے جا سکتے ہیں۔