کراچی کے مختلف علاقوں میں رات گئے ہلکی بارش سے موسم خوشگوار

کراچی(20 جولائی 2025): شہر قائد کے مختلف علاقوں میں رات گئے ہونیوالے ہلکی بارش سے موسم خوشگوار ہوگیا۔

تفصیلات کے مطابق کراچی میں بادلوں کا راج ہے، رات گئے ملیر کینٹ، صفورا گوٹھ، گلستان جوہر، اسکیم 33، نارتھ ناظم آباد، سائٹ ایریا، نارتھ کراچی سمیت مختلف علاقوں میں کہیں ہلکی کہیں تیز بارش سے موسم خوشگوار ہوگیا۔

شہرمیں آئندہ چوبیس گھنٹوں میں مزید بارش کا امکان ہے جبکہ طارق روڈ، بہادر آباد، اسٹیڈیم روڈ، بلوچ کالونی اور اطراف بھی ہلکی بارش ریکارڈ ہوئی ہے۔

محکمہ موسمیات کا کہنا ہے کہ صبح سویرے بھی کراچی میں کہیں رم جھم تو کہیں ہلکی بارش ہوئی ہے جبکہ آج بھی دن بھر وقفے وقفے سے ہلکی بارش کا امکان ہے۔

محکمہ موسمیات کا کہنا ہے کہ شہر کا اس وقت مطلع ابر آلود ہے اور سمندری ہوائیں جزوی بحال ہیں ہوا میں نمی کا تناسب زائد ہونے سے موسم مرطوب رہے گا اور آج پارہ 34 ڈگری سینٹی گریڈ تک جا سکتا ہے۔