کراچی : چیف میٹرولوجسٹ امیر حیدر لغاری نے کراچی والوں کو مون سون بارشوں کے تیسرے اسپیل سے خبردار کردیا۔
تفصیلات کے مطابق کراچی میں سمندری ہوائیں جزوی بحال ہے تاہم رفتار کم ہونے کی وجہ سے حبس کی کیفیت برقرار ہے۔
محکمہ موسمیات نے بتایا کہ شہر میں جاری حبس کی کیفیت کل تک رہ سکتی ہے جبکہ شہر کا موسم گرم و مرطوب رہنے کے ساتھ صبح و رات کے اوقات میں بوندا باندی کا امکان ہے.
چیف میٹرولوجسٹ امیر حیدر لغاری کی جانب سے کہا گیا کہ کراچی میں صبح و رات کے اوقات میں بوندا باندی، ہلکی بارش کا امکان ہے تاہم کل کے بعد سمندری ہوائیں مکمل بحال ہوں گی۔
امیر حیدر لغاری نے پیش گوئی کی کہ کراچی میں مون سون کا تیسرا اسپیل 16 جولائی سے داخل ہونے کا امکان ہے تاہم رواں سال مون سون ستمبر تک جاری رہ سکتا ہے۔
دوسری جانب 13 سے17 جولائی کے دوران ملک کے بیشترعلاقوں میں گرج چمک کے ساتھ موسلا دھاربارش کی پیش گوئی کی گئی ہے۔
محکمہ موسمیات کا کہنا ہے راولپنڈی، گوجرانوالہ، لاہور، اسلام آباد،پشاوراورسیالکوٹ سمیت کئی شہروں میں شدیدبارشوں کا امکان ہے۔
کشمیر، گلگت بلتستان، مری، گلیات، سوات، مانسہرہ اور دیامر میں بھی گرج چمک کے ساتھ بارش متوقع ہے، موسلا دھار بارشوں کے باعث مقامی نالوں میں طغیانی کا خدشہ ہے۔
موسم سے متعلق خبریں
گیارہ سے سترہ جولائی کشمیر، پنجاب، خیبرپختونخوا اور اسلام آباد میں ژالہ باری کےساتھ بارش کا امکان ظاہر کیا گیا ہے۔
تیرہ سے سولہ جولائی کے دوران بلوچستان اور پندرہ سے سترہ جولائی تک سکھر، لاڑکانہ، جیکب آباد، خیرپور میں بارش متوقع ہے۔
محکمہ موسمیات کی جانب سے پہاڑی علاقوں میں رہنے والے افراد اور سیاحوں کو محتاط رہنے کی ہدایت کی ہے۔