’ہم اپنا وطن ووٹ کی طاقت سے لیں گے، سکھ کسی بھارتی کی جان نہ لیں‘

سکھ رہنما گرپتونت سنگھ پنوں نے کہا ہے کہ ہم اپنا وطن ووٹ کی طاقت سے لیں گے سکھ اپنی آزادی کی تحریک میں کسی بھارتی کی جان نہ لیں۔

سکھ فار جسٹس کے رہنما گرپتونت سنگھ پنوں نے گزشتہ روز کینیڈا کے شہر کیلگری میں خالصتان ریفرنڈم کے اختتام پر ویڈیو لنک کے ذریعے شرکا سے خطاب کیا اور انہیں اپنی آزادی کی تحریک میں کسی بھی بھارتی کی جان نہ لینے کا درس دیتے ہوئے کہا کہ ہم اپنا وطن ووٹ کی طاقت سے حاصل کریں گے۔

گرپتونت سنگھ نے مزید کہا کہ لوگوں کو قتل کرنا بھارت کی فطرت ہے لیکن ہمارا ہتھیار خالصتان ریفرنڈم ہے۔ مودی میرا پیغام سن لے کہ ہم آزادی حاصل کرلیں گے اور بھارت کو ’’کل‘‘ کر دیں گے۔

انہوں نے کہا کہ مودی اور بھارتی حکومت پنجاب میں قتل عام کی ذمے دار ہے۔ بھارت نے ہردیپ سنگھ کو قتل کیا، اگر عدالتوں سے انصاف نہ ملا تو پھر ’’خالصائی انصاف‘‘ کیا جائے گا۔

سکھ رہنما کا کہنا تھا کہ بھارت بم مارتا ہے لیکن ہم نے پنجاب کے ہر گھر میں بم بنا دیا ہے، جو خالصتانی ووٹ کے ذریعے ’’پھٹے‘‘ گا۔

اپنے خطاب کے دوران گرپتونت سنگھ پنوں نے دلی بنے گا خالصتان کے نعرے بھی لگوائے۔ اس موقع پر شرکا کا جذبہ دیدنی تھا جنہوں نے خالصتان کے حق میں زبردست نعرے بازی کی۔

اس سے قبل کیلگری میں سکھ فار جسٹس کے زیر اہتمام خالصتان ریفرنڈم میں ہزاروں سکھوں نے حق رائے دہی استعمال کر کے اپنے لیے آزادی وطن خالصتان کے قیام کے حق میں ووٹ دیا۔ ووٹ کے آغاز کا وقت صبح 9 بجے تھا لیکن مقررہ وقت سے قبل ہی ووٹنگ مرکز کے باہر طویل قطاریں لگ گئی تھیں۔

ووٹنگ کا وقت ختم ہو جانے کے باوجود سینکڑوں افراد قطاروں میں ووٹ ڈالنے کے لیے کھڑے تھے جس کے باعث منتظمین کو ووٹنگ کے لیے ایک گھنٹے کا مزید وقت بڑھانا پڑا۔

ووٹ ڈالنے والوں میں ہر عمر کے افراد شامل تھے، سیکڑوں افراد مختلف شہروں سے کوچز کے ذریعے ووٹنگ مرکز تک پہنچے تھے۔ انتظامیہ کی طرف سے تمام دن قطار میں کھڑے افراد میں پانی کی بوتلیں اور شربت تقسیم کیا جاتا رہا جب کہ اس موقع پر سکھ فنکار تمام دن ڈھول کی تھاپ پر شرکا کو خالصتان کے حق میں گیت سنا کر ان کے جذبے جگاتے رہے۔

https://urdu.arynews.tv/referendum-in-canada-for-khalistan/