کراچی: پی آئی اے نے یورپ کے بعد دیگر ممالک کے لیے فلائٹ آپریشن کی بحالی پر کام شروع کر دیا ہے، بارسلونا اور میلان کے لئے پروازیں شروع کی جائے گی۔
تفصیلات کے مطابق وزیر دفاع خواجہ آصف نے قومی ایئرلائن کو بارسلونا اور میلان کے لیے براہ راست پروازیں شروع کرنے کی منصوبہ بندی کی ہدایت دی ہے۔
،وزیردفاع نے کہا کہ اوورسیز پاکستانیوں کی بڑی تعداد ان شہروں میں مقیم ہے، اس لیے انہیں براہ راست پروازوں کے ذریعے سفری سہولت فراہم کی جائے۔
ذرائع کے مطابق پی آئی اے نے بارسلونا اور میلان کے لیے پروازیں شروع کرنے کے حوالے سے منصوبہ بندی کا آغاز کر دیا ہے، جس کے بعد یورپ میں مقیم پاکستانیوں کو بہتر سفری سہولت میسر آنے کی امید ہے۔
یاد رہے یورپ میں پروازوں کی بحالی کے بعد پاکستان انٹرنیشنل ایئرلائن (پی آئی اے) نے لاہور سے پیرس کیلئے پروازوں کا آغاز کیا تھا۔
پاکستان میں متعین فرانسیسی سفیر نے پاکستان انٹرنیشنل ایئرلائن کی پیرس کے لیے پروازوں کی بحالی کو خوش آئند قرار دیا تھا اور فرانسیسی سفارتکاروں نے وطن واپسی کیلیے پی آئی اے کی براہ راست پرواز کا انتخاب کیا تھا۔