کراچی کے علاقے ڈیفنس فیز 6 میں گزشتہ روز مسجد کے باہر ہونے والی فائرنگ سے جاں بحق ہونے والے سینئر وکیل خواجہ شمس الاسلام کے قتل کا مقدمہ درج کرلیا گیا۔
اے آر وائی نیوز کی رپورٹ کے مطابق فائرنگ کے واقعے میں جاں بحق اور ان کے بیٹے سمیت 2 افراد زخمی ہوئے، ملزم مقتول کے سابق گن مین کا بیٹا نکلا۔
خواجہ شمس الاسلام کے قتل کامقدمہ ان کے بھائی خواجہ فیض الاسلام کی مدعیت میں درخشان تھانے میں درج کیا گیا ہے۔
پولیس حکام کے مطابق مذکورہ مقدمے میں 7 افراد کو نامزد کیا گیا ہے، مقدمے میں دہشت گردی، قتل سمیت دیگر دفعات شامل کی گئی ہیں۔
ڈی آئی جی ساؤتھ اسد رضا کے مطابق خواجہ شمس الاسلام کا قاتل ان کے سابق گن مین کا بیٹا عمران آفریدی ہے، جس نے اعتراف جرم کرلیا، ملزم نے چند ماہ قبل بھی خواجہ شمس پر حملہ کیا تھا۔
ڈی آئی جی ساؤتھ کے مطابق ملزم کا الزام ہے کہ اس کے والد کو خواجہ شمس الاسلام نے 2021 میں قتل کرایا تھا۔ تاہم اب وکیل پر حملے کی سی سی ٹی وی فوٹیج منظرعام پر آگئی ہے۔