ٹھٹھہ: وفاقی وزیر برائے آبی وسائل اور سینئر رہنما پاکستان پیپلز پارٹی خورشید شاہ کا کہنا ہے کہ نگراں وزیر اعظم کے نام کا اعلان اچانک کیا جائے گا۔
کے فور منصوبے کے مختلف شعبوں کا معائنہ کرنے کے دوران خورشید شاہ نے میڈیا سے گفتگو میں کہا کہ حکومت 9 اگست کو ختم ہو جائے گی جبکہ 10 اگست سے نگراں حکومت کا سیٹ اپ شروع ہو جائے گا۔ انہوں نے بتایا کہ نگراں وزیر اعظم کیلیے 5 ناموں پر غور ہو رہا ہے جبکہ حتمی نام کا اعلان اچانک کیا جائے گا۔
گزشتہ روز اے آر وائی نیوز کے پروگرام ’سوال یہ ہے‘ میں گفتگو کرتے ہوئے خورشید شاہ نے کہا تھا کہ نگراں وزیر اعظم کیلیے 5 نام شارٹ لسٹ کر لیے گئے، کسی پارٹی کا بندہ نگراں وزیر اعظم نہیں ہو سکتا، معلوم نہیں وزیر خزانہ اسحاق ڈار کا نام کیسے سامنے آیا؟
وفاقی وزیر کا کہنا تھا کہ 9 اگست کو قومی اسمبلی تحلیل کی جائے گی یہ طے ہوا ہے۔ ان کا کہنا تھا کہ نگراں وزیر اعظم گزشتہ حکومت کے پروگرام پر کام کر سکیں گے، نگراں وزیر اعظم کسی نئے پروگرام پر کام نہیں کر سکیں گے۔
اس سے قبل اپنے ایک بیان میں خورشید شاہ نے کہا تھا کہ حکومت قومی اسمبلی کی آئینی مدت سے تجاوز نہیں کرے گی، اس ضمن میں قیاس آرائیوں کا حقیقت سے کوئی تعلق نہیں۔
ان کا کہنا تھا کہ جمہوریت کی جدوجہد کرنے والی جماعتیں آئین کی پاسداری کریں گی، اس ضمن میں کسی کو کوئی شک شبہ نہیں ہونا چاہیے، ہم پاکستان کو مضبوط، خوشحال اور ترقی یافتہ دیکھنا چاہتے ہیں۔
وفاقی وزیر نے کہا تھا کہ مخصوص ایجنڈے پر آنے والے ملک کو تباہی کی طرف لے جاتے ہیں، ہم نے ظلم برداشت کیا مگر پارٹی چھوڑی اور نہ سیاست چھوڑی، ہمارا رشتہ کسی مفاد سے نہیں بلکہ اس دھرتی کی مٹی سے جڑا ہے۔