اسلام آباد: وفاقی وزیر برائے آبی وسائل اور سینئر رہنما پاکستان پیپلز پارٹی خورشید شاہ نے واضھ کیا ہے کہ حکومت قومی اسمبلی کی آئینی مدت سے تجاوز نہیں کرے گی، اس ضمن میں قیاس آرائیوں کا حقیقت سے کوئی تعلق نہیں۔
وفاقی وزیر خورشید شاہ نے اپنے ایک بیان میں کہا کہ جمہوریت کی جدوجہد کرنے والی جماعتیں آئین کی پاسداری کریں گی، اس ضمن میں کسی کو کوئی شک شبہ نہیں ہونا چاہیے، ہم پاکستان کو مضبوط، خوشحال اور ترقی یافتہ دیکھنا چاہتے ہیں۔
رہنما پیپلز پارٹی نے کہا کہ مخصوص ایجنڈے پر آنے والے ملک کو تباہی کی طرف لے جاتے ہیں، ہم نے ظلم برداشت کیا مگر پارٹی چھوڑی اور نہ سیاست چھوڑی، ہمارا رشتہ کسی مفاد سے نہیں بلکہ اس دھرتی کی مٹی سے جڑا ہے۔
انہوں نے کہا کہ تاریخ گواہ ہے اس دھرتی کیلیے ہم نے بے مثال قربانیاں دیں، ہم آئندہ بھی اپنے ملک کیلیے قربانیاں دیتے رہیں گے، جمہوریت، آئین اور وطن کی سالمیت پر سمجھوتہ نہیں کریں گے، سیاست نئے پاکستان کے معماروں کی طرح موسم بہار کا نام نہیں۔
ان کا کہنا تھا کہ یہ کانٹوں کی وہ سیج ہے جس پر زخم بھی لگتے ہیں اور جان بھی جاتی ہے، عالمی حالات میں دشمن ہمیں بند گلی میں دھکیلنا چاہتا ہے، آنے والے وقت میں میں پاکستان کو خوشحال دیکھ رہا ہوں۔
خورشید شاہ نے کہا کہ ملکی مفاد میں ہم مل بیٹھ کر فیصلے کر رہے ہیں، ان فیصلوں کے مثبت اور دورس نتائج نکلیں گے۔