شمالی کوریا کے رہنما کم جونگ ان نے فوج کو حقیقی جنگ میں مقابلے کی صلاحیتوں کو جانچنے کے لیے مشقیں تیز کرنے کی ہدایت کر دی۔
شمالی کوریا کے رہنما کم نے دشمن کے ہوائی اڈے کی تباہی کی نقل کرنے والے میزائل تجربات کی ایک سیریز کی نگرانی کی ہے اور انہوں نے فوج سے "حقیقی جنگ” کی نقل کرنے کے لیے مشقیں تیز کرنے پر زور دیا ہے۔
سرکاری میڈیا نے کم کی جوان بیٹی کو بھی صوفے پر بیٹھے ہوئے دکھایا جب وہ ان مناظر کو دیکھ رہی تھی جسے کامیابی کے طور پر بیان کیا گیا۔
جمعہ کے روز سرکاری اخبار روڈونگ سنمون میں شائع ہونے والی تصاویر میں دکھایا گیا ہے کہ اس تجربے میں چھ مختصر فاصلے تک مار کرنے والے بیلسٹک میزائل لانچ وہیکلز شامل ہیں۔
ہر ایک لانچ وہیکل چار میزائل لے جانے کی صلاحیت رکھتے ہیں۔ ان لانچرز کو ساحلی جنگلاتی علاقے کے ساتھ قطار میں کھڑے دکھایا گیا۔
شمالی کوریا کی سرکاری خبر رساں ایجنسی کے سی این اے نے کہا کہ "اسٹرائیک مشن” کے لیے تربیت یافتہ ایک یونٹ نے پانیوں پر ہدف کو نشانی بنایا اور "حقیقی جنگ کا مقابلہ کرنے” کی اپنی صلاحیت کا مظاہرہ کیا۔
https://urdu.arynews.tv/north-korea-fires-ballistic-missile-towards-sea-south-korea-says/
جنوبی کوریا اور امریکا کی اعلان کردہ مشترکہ فوجی مشقوں سے قبل شمالی کوریا نے بیلسٹک میزائل فائر کیا ہے۔ یہ میزائل شمالی کوریا کی جانب سے مشترکہ مشقوں کو روکنے کے انتباہ کے بعد داغا گیا ہے۔
جنوبی کوریا کی فوج کا کہنا ہے کہ اسے پتہ چلا ہے کہ شمالی کوریا نے اپنے مغربی ساحل سے دور پانیوں کی طرف ایک مختصر فاصلے تک مار کرنے والا بیلسٹک میزائل داغا ہے۔
جنوبی کوریا کے جوائنٹ چیفس آف اسٹاف نے کہا کہ جمعرات کی شام تقریباً 6 بجکر 20 منٹ پر مغربی ساحلی شہر نمپو کے قریب سے میزائل فائر کیا گیا تاہم فوری طور پر اس بات کا اندازہ نہیں لگایا جا سکا کہ میزائل نے کتنی دور تک پرواز کی۔
یہ اقدام شمالی کوریا کے رہنما کم جونگ اُن کی بااثر بہن کم یو جونگ کے منگل کو خبردار کرنے کے بعد سامنے آیا ہے۔ وارننگ میں کہا گیا تھا کہ ان کا ملک امریکا اور جنوبی کوریا کے خلاف "فوری اور زبردست کارروائی” کرنے کے لیے تیار ہے۔
امریکا اور جنوبی کوریا 13 مارچ سے شروع ہونے والی کم از کم 10 دنوں تک بڑے پیمانے پر فوجی مشقیں کریں گے جنہیں "فریڈم شیلڈ” مشق کہا جاتا ہے۔