پشاور: خیبر پختونخوا حکومت نے آمدن میں اضافے کیلیے ریسٹ ہاؤسز کی لیز پالیسی تبدیل کرنے سمیت اہم فیصلے کر لیے۔
وزیر اعلیٰ علی امین گنڈاپور کی زیرِ صدارت محکمہ سیاحت کا اجلاس ہوا جس میں متعلقہ صوبائی کابینہ اراکین، چیف سیکریٹری کے سوا محکمہ سیاحت کے حکام نے شرکت کی۔
اجلاس میں محکمہ سیاحت کے ریسٹ ہاؤسز کے بہتر انتظام سے متعلق امور پر غور کیا گیا۔
اجلاس میں فیصلہ کیا گیا کہ آمدن میں اضافے کیلیے ریسٹ ہاؤسز کی لیز پالیسی تبدیل کی جائے گی جبکہ ریسٹ ہاؤسز کیلیے نجی سرمایہ کاری کو راغب کرنے کیلیے طویل المدتی لیز پالیسی بنائی جائے گی۔
فیصلہ کیا گیا کہ سرمایہ کاری کے حساب سے ریسٹ ہاؤسز کی لیز کا دورانیہ رکھا جائے گا، لیز پالیسی میں ترامیم کیلیے متعلقہ کابینہ اراکین و دیگر حکام پر مشتمل کمیٹی بھی تشکیل دی جائے گی جو ایک ہفتے کے اندر پالیسی میں ضروری ترامیم تجویز کرے گی۔
محکمہ سیاحت کے ریسٹ ہاؤسز کی لیز سے متعلق معاملات کی نگرانی کیلیے کمپنی کو فعال بنانے کا بھی فیصلہ کیا گیا۔
اجلاس میں وزیر اعلیٰ علی امین گنڈاپور نے ہدایات دیں کہ محکمہ سیاحت کی ٹیکنیکل کمیٹی کی تشکیل کیلیے متعلقہ قوانین میں ترمیم اور سی ٹی اے کے بورڈ آف ڈائریکٹرز کی تعیناتی کے عمل کو تیز کیا جائے۔
علی امین گنڈاپور نے ہدایات دیں کہ محکمہ سیاحت کے زیرِ انتظام کیمپنگ پوڈز کو بھی جلد از جلد آؤٹ سورس کیا جائے اور سرکاری اثاثوں کی انوینٹری کو ڈیجیٹائزیشن کیا جائے۔