کویت نے اومیکرون قسم سامنے آنے پر کورونا خدشات کے باعث ویکسین کی بوسٹر ڈوز لازمی قرار دینے کا فیصلہ کیا ہے۔
کویتی میڈیا کے مطابق یہ فیصلہ پیر کے روز ہونے والے کابینہ اجلاس میں کیا گیا جس میں یہ طے پایا کہ وہ افراد جنہوں جو مکمل ویکسینیٹڈ ہیں اور انہیں 9 ماہ کا عرصہ گزر چکا ہے انہیں تیسری ڈوز لگائی جائے گی۔
کابینہ نے فیصلہ کیا ہے کہ آئندہ اتوار سے آنے والے مسافروں کو 10 دن تک گھر میں قرنطینہ کرنا ضروری ہو گا جب تک کہ وہ اپنی آمد کے 72 گھنٹوں کے اندر کورونا وائرس کے لیے منفی پی سی آر ٹیسٹ حاصل نہ کریں۔
افریقا میں دریافت ہونے والی کرونا کی نئی قسم سے نمٹنے کے لئے کویت نے بڑے فیصلے کر رکھے ہیں۔
خلیجی ملک نے 9 افریقی ممالک کے ملک میں براہ راست داخلے پر پابندی عائد کی ہے۔
جنوبی افریقہ ، نمیبیا ، بوٹسوانا ، زمبابوے ، موزمبیق ، لیسوتھو ، ایسواٹینی ، زامبیا اور ملاوی کے ساتھ براہ راست کمرشل پروازوں کو فوری طور پر بند کیا جا چکا ہے۔