لاہور : سانحہ  9 مئی کے 2 مقدمات کا محفوظ فیصلہ آج سنایا جائے گا، مقدمات کا فیصلہ نو اگست کو محفوظ کیا گیا تھا۔

تفصیلات کے مطابق لاہور کی انسدادِ دہشت گردی عدالت آج 9 مئی کے دو اہم مقدمات کا محفوظ فیصلہ سنائے گی۔

مقدمات میں تھانہ شادمان جلاؤ گھیراؤ کیس اور جناح ہاؤس کے قریب پولیس کی گاڑیاں جلانے کا کیس شامل ہیں۔ عدالت کے جج منظر علی گل جیل ٹرائل کے دوران فیصلہ سنائیں گے۔

تھانہ شادمان جلاؤ گھیراؤ کیس کا فیصلہ 9 اگست کو محفوظ کیا گیا تھا، جس میں کوٹ لکھپت جیل میں 25 ملزمان کا ٹرائل مکمل کیا گیا، اس کیس میں 45 گواہوں نے بیانات ریکارڈ کرائے۔

مقدمے میں سابق وزیر خارجہ شاہ محمود قریشی، ڈاکٹر یاسمین راشد، عمر سرفراز چیمہ، میاں محمود الرشید، اعجاز چوہدری، عالیہ حمزہ اور صنم جاوید سمیت دیگر ملزمان نامزد ہیں۔

مزید پڑھیں : لاہور : 9 مئی کے واقعات سے متعلق 2 اہم مقدمات کا فیصلہ آئندہ 2 روز میں سنائے جانے کا امکان

دوسرا مقدمہ جناح ہاؤس کے قریب پولیس کی گاڑیاں جلانے سے متعلق ہے، جس میں 17 ملزمان کا جیل ٹرائل ہوا۔ اس کیس میں بھی 45 سرکاری گواہان کے بیانات پر وکلا نے جرح مکمل کی ہے۔

دونوں مقدمات میں شامل ملزمان کے خلاف گواہی اور شواہد ریکارڈ ہونے کے بعد عدالت آج محفوظ فیصلہ سنائے گی، جس کا سیاسی اور قانونی دونوں سطحوں پر اہم اثر متوقع ہے۔

خیال رہے اس سے قبل 9 مئی کے مقدمات میں پی ٹی آئی کی مرکزی قیادت سمیت دیگر رہنماوں کو قید کی سزا سنائی جا چکی ہے۔