معروف اسپورٹس کمپنی نے اسرائیلی فٹبال ٹیم کی اسپانسر شپ ختم کر دی

دنیا کی معروف اسپورٹس کمپنی پوما نے اسرائیل کی قومی فٹبال ٹیم سے اسپانسر شپ ختم کرنے کا اعلان کیا ہے۔

غزہ پر اسرائیلی جارحیت کے خلاف دنیا بھر میں احتجاج اور اس کے خلاف اقدامات کا سلسلہ جاری ہے ایسے میں ایک معروف اسپورٹس کمپنی پوما کی جانب سے صہیونی ریاست کی قومی فٹبال ٹیم کی اسپانسر شپ ختم کرنے کا اعلان بھی سامنے آیا ہے۔

برطانوی خبر رساں ادارے روئٹرز نے فنانشل ٹائمز کے حوالے سے لکھا کہ جرمن کمپنی پوما نے اسرائیلی فٹ بال ایسوسی ایشن کے ساتھ مزید معاہدہ کرنے سے انکار کر دیا ہے جس کے بعد آئندہ سال ٹیم کو کِٹس بھی مہیا نہیں کی جائیں گی۔

اسرائیل اور حماس کے درمیان جنگ کے بعد بائیکاٹ مہم کی وجہ سے کئی برانڈ متاثر ہوئے ہیں تاہم اس رپورٹ کے مطابق پوما نے یہ فیصلہ اپنی وسیع حکمت عملی کے تحت مالی وجوہات کی بنیاد پر کیا ہے۔

روئٹرز کے مطابق اس حوالے سے اس نے پوما کا موقف جاننے کے لیے مذکورہ کمپنی سے رابطہ کیا تاہم تاحال وہاں سے کوئی جواب موصول نہیں ہوا ہے۔