مور ایک خوبصورت پرندہ ہے جو عموماً اونچی پرواز نہیں کرتا لیکن آج ہم آپ کو اس کی اونچی اور طویل اڑان کی دلفریب ویڈیو دکھا رہے ہیں۔
کرہ ارض پر کئی خوبصورت چرند، پرند پائے جاتے ہیں جن میں ایک مور بھی ہے جو اپنے رنگ برنگے پنکھ اور خوبصورت دم کے ساتھ مسحور کن رقص کی وجہ سے مشہور ہے۔ یہ دلفریب رنگوں کے علاوہ سفید رنگ میں بھی پایا جاتا ہے جو اس کی خوبصورتی کو مزید چار چاند لگا دیتا ہے۔
مور ایک طویل جثہ پرندہ ہے اور اسی طویل قد وقامت کے باعث ان کے بارے میں یہ تصور عام ہے کہ یہ اونچی اڑان نہیں بھرتے پرواز کرتے ہیں تو مختصر اور زمین سے قریب ہی پرواز کرتے دکھائی دیتے ہیں لیکن بعض اوقات ایسے حیران کن نظارے سامنے آتے ہیں کہ لوگ ورطہ حیرت میں مبتلا ہو جاتے ہیں۔
مور کو اپنے رنگین، متحرک اور مکمل پنکھوں کو لہراتے دیکھنا ایک نایاب نظارہ ہے جو کسی کسی کو دیکھنے کو ہی ملتا ہے وہ بھی ان کی مختصر اور نیچی اڑان کی صورت، لیکن حال میں بھارت میں ایک مور نے دن کے ڈھلتے منظر نامے میں اپنے خوبصورت پنکھ پھیلائے آسمان کی بلندیوں پر طویل پرواز کی اور اس مسحور کن لمحات کو کیمرے کی آنکھ نے محفوظ کیا جو بعد ازاں ویڈیو کی صورت سوشل میڈیا پر وائرل ہوگئی۔
اس وائرل ویڈیو میں ایک مور کو ابتدا میں بجلی کے ایک تار پر بیٹھے دکھایا گیا ہے پھر وہ اڑان بھرنے کے لیے اپنے پنکھ کھولتا ہے اور آسمان کی بلندیوں کی جانب پرواز شروع کر دیتا ہے۔
Have you ever seen a peacock fly? pic.twitter.com/9qe763rkaH
— CCTV IDIOTS (@cctvidiots) July 31, 2023
مور کی فضا میں اس طویل پرواز کو مختلف زاویوں سے فلمایا گیا جو ناقابل فراموش دلکش منظر ہے۔ اس ویڈیو کو ’’کیا آپ نے کبھی مور کو اڑتے دیکھا ہے؟ کے عنوان سے ٹوئٹر پر شیئر کیا گیا ہے۔
مذکورہ ویڈیو کو اب تک ایک ملین سے زائد صارفین دیکھ اور پسندیدگی کا اظہار کر چکے ہیں جب کہ ہزاروں اس کو ری ٹوئٹ کر چکے ہیں۔
یہاں بتاتے چلیں کہ مور کبھی امرا کی خوراک میں بھی شامل رہا ہے۔ یہ خوبصورت پرندہ جب اپنے پروں اور دم کو پھیلا کر رقص کرتا ہے تو ممکنہ طور پر اپنی مادہ ساتھی کو اپنی جانب راغب کرنے کی کوشش کر رہا ہوتا ہے۔
خوبصورت دم نر مور کا خاصا ہے اور ان کی یہ رنگین دم کئی سالوں بعد مکمل طور پر تیار ہوتی ہے۔