یوم آزادی کے موقع پر ملک بھر کے بازاروں میں ملنے والے پلاسٹک کے باجوں کی ایک منفی روایت ہر سال پروان چڑھ رہی ہے جو نہ صرف ایک غیر اخلاقی حرکت ہے ساتھ ہی اسے انسانی صحت پر منفی اثرات بھی مرتب ہورہے ہیں۔
ان پلاسٹک کے باجوں کی تیز آوازوں سے نہ صرف عام شخص متاثر ہوتا ہے بلکہ وہ لوگ جو زیادہ شور برداشت نہیں کرسکتے طبی لحاظ سے ان کی سماعت بھی بہت زیادہ متاثر ہوتی ہے۔
اس حوالے سے اے آر وائی نیوز کے پروگرام باخبر سویرا میں ای این ٹی اسپیشلسٹ ڈاکٹر سیف اللہ میر نے ناظرین کو اس کے مضر اثرات سے آگاہ کیا۔
انہوں نے بتایا کہ کرکٹ میچوں کے دوران یا یوم آزادی کے موقع پر گلی محلوں میں بچوں اور جوانوں کے ہاتھوں میں جو باجے ہوتے ہیں ان کی آواز سے آپ کی قوت سماعت بہت بری طرح متاثر ہوتی ہے، اس سے چکر بھی آسکتے ہیں اور زائد عمر کے لوگوں کیلئے بہت خطرناک ہے۔
اس مسئلہ کا علاج بتاتے ہوئے انہوں نے بتایا کہ ایسے مواقعوں پر آپ کو چاہیے کہ کانوں میں فوم والے ایئر پلگز لگالیں، یا وہ فوری طور پر میسر نہ ہو تو روئی بھی لگاسکتے ہیں اس سے آواز کی شدت میں کسی حد تک کمی واقع ہو سکتی ہے۔