ایف آئی اے امیگریشن نے بارڈر کراسنگ پوائنٹ طور خم پر انسانی اسمگلنگ کی بڑی کوشش ناکام بنا دی۔
تفصیلات کے مطابق ایف آئی اے امیگریشن نے طورخم بارڈر پر کارروائی کرتے ہوئے انسانی اسمگلنگ میں ملوث 4 مسافر اور 2 ایجنٹس گرفتارکرلئے۔
ایف آئی اے نے کہا کہ غیر قانونی طور پر یورپ جانے کی کوشش میں 4 مسافر وں کو اینٹی ہیومن ٹریفکنگ سرکل پشاور منتقل کردیا گیا جبکہ مسافروں کی نشاندہی پر 2 ایجنٹ بھی گرفتار کئے۔
ترجمان کا کہنا تھا کہ مسافروں میں رحمان اللہ، ناصر الدین ، سرتاج اور ریاض احمد شامل ہیں، مسافروں کو افغانستان میں غیر قانونی طور پر داخل ہو کر یورپ جانے کی کوشش کرتے ہوئے گرفتار کیا گیا۔
ابتدائی تفتیش کے مطابق مسافروں نے اپنے پاسپورٹس سے تاجکستان کے ویزے ہٹا دیے تھے تاکہ امیگریشن حکام کو گمراہ کیا جا سکے۔
ترجمان کا کہنا تھا کہ دوران تفتیش مسافروں نے اپنے ایجنٹوں اور سہولت کاروں کی نشاندہی کی مسافروں کی نشاندہی پر 2 ایجنٹوں کو گرفتار کر لیا گیا، ایجنٹوں کی شناخت لقمان اور سعید اقبال کے نام سے ہوئی۔
چھاپہ مار کاروائی میں ایجنٹ سعید سے 1,54,000 روپے جبکہ ایجنٹ لقمان سے 30,000 روپے بھی برآمد ہوئے جبکہ ملزمان کے موبائل فونز سے غیر قانونی امیگریشن سے متعلق مواد اور پیغامات بھی برآمد کر لیے گئے۔
ترجمان کے مطابق ملزمان سے افغان پاسپورٹ اور روسی زبان میں حلف نامے جنہیں ممکنہ طور پر روس میں استعمال کیا جانا تھا بھی برآمد کر لیے گئے، جس کے بعد ملزمان کو مزید قانونی کارروائی کے لیے ایف آئی اے، اینٹی ہیومن ٹریفکنگ سرکل پشاور منتقل کر دیا گیا ہے اور مزید تفتیش جاری ہے