بھارت کی ریاست کرناٹک کے شہر چتردرگا میں شوہر آن لائن سٹے بازی میں ڈیڑھ کروڑ روپے ہار گیا جس کے بعد اس کی بیوی نے خودکشی کر لی۔
میڈیا رپورٹس کے مطابق واقعہ اُس وقت سامنے آیا جب خودکشی کرنے والی لڑکی کے والد نے پولیس سے رجوع کیا اور الزام لگایا کہ میری بیٹی قرض خواہوں کے دباؤ میں تھی جو اکثر اس کے دروازے پر آ کر رقم کا مطالبہ کرتے تھے۔
والد نے بتایا کہ بیٹی رنجیتھا اور داماد درشن کی شادی 2020 میں ہوئی تھی، شادی کے تقریباً ایک سال بعد بیٹی کو معلوم ہوا کہ اس کا شوہر کرکٹ کی سٹے بازی میں ملوث ہے۔
انہوں نے بتایا کہ قرض دینے والے اکثر بیٹی کے گھر آ کر رقم کا مطالبہ کرتے تھے اور بعض اوقات داماد سے جھگڑا بھی کرتے تھے، ملزمان نے رنجیتا کو ذہنی طور پر ہراساں کیا اور اسے انتہائی قدم اٹھانے پر مجبور کیا۔
درشن نے 12 سے زائد افراد سے 84 لاکھ روپے کی رقم حاصل کی تھی لیکن کرکٹ کی سٹے بازی میں سب ہار گیا۔
پولیس نے آئی پی سی کی دفعہ 306 کے تحت مقدمہ درج کرنے کے بعد تین ملزمان کو گرفتار کر لیا جبکہ معاملے کی مزید تحقیقات کی جا رہی ہیں۔