’بزدار نے تو کبھی سیاست کی ہی نہیں تو علیحدگی کس سے اختیار کی‘

کراچی: مشیر زراعت سندھ منظور وسان کا سابق وزیر اعلیٰ پنجاب عثمان بزدار کے سیاست چھوڑنے پر ردعمل آگیا۔

اے آر وائی نیوز کے مطابق پیپلزپارٹی رہنما منظور وسان نے کہا کہ عثمان بزدار کی جانب سے سیاست چھوڑنے پر دکھ ہوا اور دکھ تو یہ ہے کہ بزدار نے تو کبھی سیاست کی ہی نہیں تو علیحدگی کس سے اختیار کی۔

انہوں نے کہا کہ ہوتا یوں کہ سیاست بزدار کو چھوڑتی لیکن یہاں تو بزدار نے سیاست چھوڑ دی۔

منظور وسان نے کہا کہ سیاست سے بزدار کو تو نقصان نہیں ہوا البتہ سیاست کو بزدار سے نقصان ضرور ہوا ہے۔

پی پی رہنما نے مزید کہا کہ جس نے بزدار کو وزارت اعلیٰ سے ہٹایا آج وہ اینٹی کرپشن میں اندر اور بزدار باہر ہے، انہوں نے سیاست چھوڑ دی پارٹی نہیں کیونکہ وہ پی ٹی آئی میں کبھی تھے ہی نہیں۔

واضح رہے کہ اس سے قبل سابق وزیراعلیٰ پنجاب عثمان بزدار نے کوئٹہ میں پریس کانفرنس کرتے ہوئے 9 مئی کے واقعات کی سخت مذمت کی تھی اور سیاست سے دستبردار ہونے کا اعلان کیا تھا۔