لاہور: سینئر وزیر پنجاب مریم اورنگزیب کا بانی پی ٹی آئی کے بیان پر ردعمل آگیا۔
اے آر وائی نیوز کے مطابق سینئر وزیر پنجاب مریم اورنگزیب کا کہنا ہے کہ معافی نہیں مانگوں گا کہنے والا خود ساختہ انقلابی منتیں ترلوں پر اتر آیا۔
انہوں نے کہا کہ خود ساختہ انقلابی فوج سے کس بات کے مذاکرات چاہتا ہے، شہدا کے مجسمے توڑے، جی ایچ کیو اور ایئربیس پر حملے کیے، کور کمانڈر کا گھر جلایا، 9 مئی کے لیے معافی مانگو مذاکرات نہیں۔
مریم اورنگزیب نے کہا کہ فاشسٹ کی بات صرف اور صرف اقتدار کے لیے ہوتی ہے، اقتدار کی خاطر آئین توڑنے والا فاشسٹ ہوتا ہے۔
انہوں نے کہا کہ فاشسٹ سیاسی مخالف کو اذیت دینے کے لیے قید والد کے سامنے بیٹی کو گرفتار کرتا ہے، فاشسٹ وہ ہوتا ہے جو میڈیا پریڈیٹر اور آزادیاں ہڑپ کرجانے والا ہوتا ہے۔
یہ پڑھیں: فوج اپنا نمائندہ مقرر کرے ہم مذاکرات کے لئے تیار ہیں، بانی پی ٹی آئی
واضح رہے کہ اس سے قبل بانی پی ٹی آئی نے اڈیالہ جیل کے کمرہ عدالت میں صحافیوں سے غیر رسمی گفتگو کرتے ہوئے کہا تھا کہ فوج اپنا نمائندہ مقرر کرے ہم مذاکرات کے لیے تیار ہیں۔
ان کا کہنا تھا کہ ملک میں غیراعلانیہ مارشل لا نافذ ہے، ایس آئی ایف سی کیا ہے؟ محسن نقوی کون ہے؟
بانی پی ٹی آئی نے محسن نقوی کو مذاکرات کا اختیار دینے سے متعلق سوال پر کہا کہ محسن نقوی نے آئی جی پنجاب سے ملکر لوگوں پر ظلم کیا، ان سے کبھی بات نہیں کروں گا۔ مریم نواز فاشسٹ ہیں۔ حکومت کا مقصد ہے کہ فوج اورپی ٹی آئی کو لڑوا کر ہماری جماعت ختم کرائی جائے۔
بانی پی ٹی آئی کا کہنا تھا کہ مجھےجوڈیشل کمپلیکس سے اغواکیا گیا توجسٹس عامر فاروق نے اسے درست قراردیا، چیف جسٹس اسلام آباد ہائیکورٹ سے گزارش ہے میرے مقدمات سے الگ ہوجائیں، ہائی کورٹ میں اور بھی جج ہیں کسی اور کیسز دے دیں جبکہ پی ٹی آئی کا کوئی بندہ نومئی میں ملوث ہے تو سزا دیں۔