امید ہے آج سے عدل کے ایوانوں میں انصاف کی واپسی ہوگی، مریم نواز

لاہور: مسلم لیگ (ن) کی چیف آرگنائزر مریم نواز کا قاضی فائز عیسیٰ کے چیف جسٹس آف پاکستان بننے پر کہنا ہے کہ امید ہے کہ آج سے عدل کے ایوانوں میں انصاف کی واپسی ہوگی۔

پارٹی کے مختلف ونگز کے اجلاسوں سے خطاب کرتے ہوئے مریم نواز نے کہا کہ دعا ہے کہ ترازو کے پلڑے سب کیلیے برابر ہوں، امید ہے نواز شریف اور ان کے مظلوم ساتھیوں کو ناانصافیوں سے نجات ملے گی۔

مریم نواز نے کہا کہ نواز شریف کو اللہ تعالیٰ نے سرخرو کر دیا ہے اور اب پاکستان کو سرخرو کرنا ہے، اللہ تعالیٰ نے ہر بار ان کو ’پلس‘ کیا اور ہر بار مائنس کرنے کی کوشش مائنس ہوگئی۔

انہوں نے کہا کہ نواز شریف دشمنی کی سوچ اصل میں پاکستان دشمنی اور عوام دشمنی کی سوچ ہے۔

ان کا کہنا تھا کہ پاکستان کو ایک نئی شروعات کی ضرورت ہے، ملک کو انتقام، ٹکراؤ اور افراتفری سے نجات دلانا ہوگی، سندھ سمیت پاکستان کے کونے کونے میں ترقی کا سفر لے کر جائیں گے، ہماری لڑائی مہنگائی، معاشی بدحالی اور بیڈگورننس سے ہے۔

مریم نواز نے کہا کہ نواز شریف اور اُن کے ساتھی ہی ملک وقوم کو مسائل کے دلدل سے نکال سکتے ہیں، لوڈشیڈنگ اور دہشتگردی ختم کی تھی اور اب مہنگائی میں کمی کا وعدہ پورا کریں گے، عوام اپنے ووٹ سے نواز شریف کو مضبوط کریں مہنگائی ہم کم کر دیں گے۔